Category Archives: ڕاپۆرت

پڕۆژەی ئێستا، پڕۆژەی چاوەڕوانبوون

دیدی منپشتیوان کەمال

فۆتۆ: پشتیوان و شێنێ

پڕۆژەی ئێستا، پڕۆژەیەکی هونەریی وماڵپەری کلتووریی سولی ئۆنە و لە ڕۆژانی ٢٧-٣١\٣\٢٠١٧، لە ژێرزەمینی ئەمنەسوورەکەی شاری سلێمانی لە نماییشدا بوو. پڕۆژەی ئێستا بۆ ماوەی نۆ مانگ کاری تێدا کراوە، سەرەتای دەستپێکردنی ئەم پڕۆژەیە بۆ ساڵێک و سێ مانگ پێش ئێستا دەگەڕێتەوە، بەڵام  نۆ مانگی تەواو کاریان لەم پڕۆژەیەدا کردووە. ئەم پڕۆژە هونەرییە شەش هونەرمەند بە حەوت کاری هونەری تیایدا بەشدارن.

پۆستەری پڕۆژەی ئێستا

ئازەر عوسمان، ڕێکخەری پڕۆژەکە، لەبارەی کۆنسێپتی پڕۆژەکەیانەوە بۆ دیدی من گوتی: “ئێمە کارمان لەسەر چاوەڕوانیکردن یان چاوەڕوانی لە کۆمەڵگەی ئێستادا کردووە. پڕۆژەکە پەیوەستە بەو کێشە و ڕووداوانەی کە لە کۆمەڵگەی ئێستای ئێمەدا ڕوو دەدەن، یان لەو واقیعەی کە ئێستا خۆمانی تیادا دەژین. ئەو شوێنەی ئێمە کارمان تیادا کردووە، بۆ دروستکردنی پرسیارێکی نوێیە، تا بتوانین لە فۆڕمێکی نوێدا پیشانی بدەینەوە، بە شێوازێک کارمان کردووە تاوەکو کێشەیەک بخەینە ڕوو لە بەرانبەر ڕۆڵی کلتووردا، چونکە کاتێکیش دەڵێین کلتوور، بەرکەوتەیە لەگەڵ ئەم کێشانەدا، بۆ ئەوەیە بتوانین کلتووریش ڕۆڵی خۆی بگێڕێت لە فۆڕمێکی تردا.”

هەروەها دەڵێت: “ئێمە هەمیشە دەڵێین هونەر کێشە دەخاتە ڕوو، ئەویش بە پیشاندانی وێنەیەک، جا ئەو وێنەیە چ واقیعی بێت یاخود وێنەیەکی خێرابێت لە گوزارشتیدا، کە لە بەرانبەر بینەردا دەیخاتە ڕوو. کارەکان هەریەکەو لە پرسیاری هونەرمەند خۆیەوە دەستی پێ کردووە، لە نموونەی کارەکان کە خۆتان دەیبینن، بە شێوەیەک کاری تیادا کراوە، کە بەر واقیعی کەسەکە خۆی بکەوێت، یاخود کەسێک ئەو تاکەی لە پڕۆژەکەدا بەشدارە لە کوێدا بەر چاوەڕوانی دەکەوێت، یاخود لەو دۆخەی ئێستا تیایدا دەژین، لە کوێدا شتێک دەبێتە پرسیارێکی دیاریکراو بۆی.”

هەڵوەرینی قژ

کۆکردنەوەی قژی خۆم کە لە ماوەی٢٧٠ڕۆژدا لە چاوەڕوانی و سترێسدا وەریون.

دیدەن عەلی

 بۆ کارە هونەرییەکەی دیدەن، خۆی لەویادا بەر چاوەڕوانی دەکەوێتەوە، لە بابەتێکی کۆمەڵایەتییەوە کە ئەویش هۆنینەوەی قژە، کاتێک باس لە چاوەڕوانی دەکەین، یاخود لە گێڕانەوەی شتێک کە پەیوەست بووە بەوەی تا چەند ئەو قژە دەهۆنیتەوە بۆ درێژبوونەوەی، بۆ ئەوەی ماوەکەی بزانیت. سێسەد و چلوپێنج دانە لە ژمارەی قژی خۆی، سێسەد و چلوپێنج دانە ڕۆژ دیدەن قژی خۆی هۆنیوەتەوە و کۆی کردووەتەوە و ئەم کارە هونەرییەی پێ ئەنجام داوە. واتە ڕۆژانە ئەم لەگەڵ کارەکەدا ژیاوە.

This slideshow requires JavaScript.

 لە کارە هونەرییەکەی ئازەر عوسماندا، ئەو کاری لەسەر دوو بەش کردووە، ئەوانیش ئەوەن کە پرسیارێکی ڕاستەوخۆ لە بینەر دەکرێت: ”ئایا ئەو چاوەڕوانی چییە؟” لایەنێکی تری کارەکە، بریتییە لە پەیوەستبوون بە میدیای نوێوە، میدیای نوێ ڕۆڵێکی کۆنترۆڵ دەگێڕێت، یان چاودێریکەر. ئەم کارە کارێکی ئۆنلاینە و لە شوێنێکی تر بەری دەکەوینەوە و بەر وەڵامەکەی خۆت دەکەویتەوە. بەشێکی تری بریتییە لەو ترسەی کە لە بەرانبەر کامێرادا، لە بەرانبەر ئۆنلایندا هەیە. ئەو ترسەی هەتە کە ناتەوێ بگوازرێتەوە بۆ ئەوی دیکە، هەمیشە دەتەوێت لە چوارچێوەیەکدا بمێنێتەوە، کە پارێزراو بێت.

This slideshow requires JavaScript.

ئازەر دەڵێت: “زۆرترین وشە کە لە پڕۆژەکەی مندا نووسراوە، وشەی هیچە، یاخود گۆدۆ، چەند جارێک ئەم وشەیە نووسراوەتەوە، بۆیە دەبینین ڕەنگە ئەمە بەرکەوتەیەکی شانۆییش بێت. بەتاییەتی لەسەر دۆخی ژینگە شتی نووسیوە یاخود کلتوور یان سیاسەت. من لێرەدا کارم لەسەر ئەوە کردووە. لە دوو شوێندا کارم کردووە و شوێنت بۆ دیاری دەکەم بۆ ئەوەی ترست نەبێت و ترست بۆ دروست نەبێت و سەربەست بیت لە وەڵامەکەتدا، سەربەست بیت لەوەی کە پرسیارێکت لێ دەکرێت.”

خاتوو ڕووز بە دوو ئیش بەشدارە، لە کاری یەکەمدا ئیشی لەسەر ژماردنی ڕۆژەکانی خۆی کردووە. کارەکە کارێکی پێرفۆڕمانسە، ئیشی لەسەر ژماردنی ڕۆژ کردووە، کە ئەمە خەڵکیش تیایدا بەشداری دەکات. وەک یارییەک وایە و خەت دەکێشین. “ئەو لێرەدا کاری لەسەر پووچی کردووە، یاخود ئەو پاسیڤییەی چاوەڕوانی، کە هەر چاوەڕێ دەکەیت و بە هیچیش ناگەیت. وەکو ئاماژەم پێ دا، هەموو ئەمانە پەیوەستن بە کۆمەڵگەی ئێمەوە، بۆ نموونە ئێمە هەموومان چاوەڕوانین و هیچیش ڕوو نادات”؛ ئازەر گوتی.

 کاری دواتر بریتییە لە کارەکەی بەهرۆز خالید، کە کارێکی هونەریی مینیماڵە و کاری لەسەر فۆڕمێکی خێرا کردووە، کە ڕاستەوخۆ پێت دەڵێت تۆ چاوەڕێیت.

هەروەها ئازەر گوتی: “شتێکی جوانی تری ناو پڕۆژەکە، ئەوە بوو کە ڕاستە خۆمان کارمان لەسەر چاوەڕوانی دەکرد، بەڵام خۆیشمان لە هەمان کاتدا بەر چاوەڕوانی کەوتین. چاوەڕوانی ئەوەین کە بەردەوام فۆڕمەکان دروست ببێت، چاوەڕێی ئەوەین کە گفتوگۆکانمان چڕتر بێت، چاوەڕێی ئەوەی فۆڕمێک دروست بکەین ڕاستەوخۆ لەگەڵ ئەو واقیعەدا بێت کە خۆمانی تێداین.”

مووچە

مووچە دیارترین بابەتی چاوەڕوانییە لەم بارودۆخەی ئێستادا بە جۆرێک هێندەی چاوەڕوانییە بۆ لێدانی دڵ و لە کار کەوتنی.

گۆڤار بابە

گۆڤار کاری لەسەر مووچە کردووە، ساڵەکانی ٢٠١٤ تا ٢٠١٧، لە ساڵی ٢٠١٤ چەند مووچە دراوە و ساڵانی دواتریش. هەموو ئەم کارە پشتی بە داتا بەستووە و داتاکان لە وەزارەتی دارایی وەرگیراوە.

دواهەمین کار، کاری شێرۆیە و بەرکەوتەی لایەنە سیاسییەکانە. تۆپێک هەڵدەدرێت، لای شێرۆ ئەو تۆپە چارەسەرە و ئەوانەی لە ناو خانەکاندان لایەنەکانن، لەوانە حکومەت و پەرلەمان و حیزبەکان و تا دوایی. تۆ یاری بە تۆپەکە دەکەیت، تا بزانیت چارەسەر لای کامیانە، بەڵام کاتێک یاریی پێ دەکەیت، دەبینین کە چارەسەر لای هیچیان نییە و تۆپەکە لای هیچیان ناوەستێت.

سەرەتا چارەسەر دواتر گەڕان، بە دوای لایەنی بەرپرس و پەیوەندیدارپاشان چاوەڕوانکردنی ئەنجام ٨ لایەن بوونیان هەیە لەم قەیرانە.

بەڕای تۆ کۆتایی لای کێیە؟

شێرۆ بەهرەدار

This slideshow requires JavaScript.

سەبارەت بە کۆکردنەوەی ئەم هونەرمەندانە بۆ دروستکردنی ئەم پڕۆژەیە و کارکردن لەسەر هەمان کۆنسێپت، کە ئەویش چاوەڕوانییە، ئازەر گوتی: “دەتوانم بڵێم ئەمە مێژوویەکی هەیە. من لە ٢٠٠٧ەوە وەک ڕێکخەری هونەری کارم کردووە لە بواری هونەری نوێدا. وەک ڕێکخەری هەشت پڕۆژە کارم کردووە. پێشتر وەک گرووپی سولی ئۆن کارمان کردووە و ئێستاش وەک ماڵپەری سولی ئۆن. ئەمە دووەم پڕۆژەی وێبسایتی سولی ئۆنە. پڕۆژەی یەکەم پڕۆژەی Touch بوو، ئەمەشیان پڕۆژەی ئێستا. وەک چۆن خۆمان لە بواری کلتووردا کار دەکەین، خۆمان بە بەرپرسیاریش دەزانین کە پڕۆژەمان هەبێت و تەنها لە چوارچێوەی تێکستدا کارەکانمان نەکەین. وەک ئەزموونی خۆم، لە دروستکردنی پڕۆژەدا، کۆنسێپتی کارەکان دەنووسمەوە و کۆنسێپتەکەش لە بۆشایی ناو خەڵکەوە وەردەگرم. هەمیشە حەزم کردووە لەو بابەتەدا کار بکەم کە بەر خەڵک دەکەوێتەوە. لە پڕۆژەکەی پێشترمان، Touch، کارمان لەسەر ئەوە کردبوو کە تەکنەلۆژیا چ کاریگەرییەک لەسەر تاک دروست دەکات، وەک دەبینین چاوەڕوانی لە هەموو چینوتوێژێکدایە، چاوەڕوانیی باشبوونی مووچە، چاوەڕوانیی کارەبا، قەیران نەمێنێت، جەنگ نەمێنێت، هەموو شتێک، هەموو شتێک وابەستە دەبێتەوە بە چاوەڕوانییەوە، بەڵام کەسیشمان جووڵەمان نییە. لێرەدا ئیشی کلتوور ئەوەیە قسەی هەبێت و ئایا دەبێت چی بکات؟ هەر ئەمەش ئەو پڕۆژەیەی دروست کردووە.”

لە وەڵامی پرسیاری ئەوەی کە چاوەڕوانی چ پەیوەندییەکی بە مۆدێرنەوە هەیە، ئازەر گوتی: “تایبەتمەندیی من لە میدیای نوێدایە. میدیای نوێ هەمیشە نوێ دەبێتەوە. ئەم نوێبوونەوەیە هەمیشە خەڵک کاری لەسەر دەکات، بەرکەوتەی هەیە لەگەڵیدا، بەڵام پرسیار ناکات بۆ، کاتێک بەر تازەترین تەکنەلۆژیای مۆبایل دەکەوین، بەر تازەترین ئەپدەیتەکان، بەکاری دەهێنین، بەڵام نازانین بۆ، نازانین ئۆنڵاین بۆ، تەنها وەک چاتێک دەیبینینەوە. لەو وردەکارییە تێناگەین کە لە ناو میدیادا بۆ دروست دەبێت، لەو سیستەمە سیاسییە تێناگەین کە بۆ میدیا دەخاتە ناوەوە، دەیەوێت چی کۆنترۆڵ بکات، چ پرسیارێک بکات یاخود چ بزنسێکی پێوە بکات. بۆیە زیاتریش کار لەسەر ئەم بابەتە دەکەین، چونکە بابەتێکە ڕۆژانە بەری دەکەوین و ڕۆژانە لەگەڵیدا دەژین. کاتێکیش پڕۆژەکە دەخەمە بەردەم هونەرمەندەکە، کۆنسێپتەکەی دەخەمە بەردەم وەک ڕێکخەرێک، جۆریک لە هەڵبژاردەیان دەدەمێ تاوەکو هەڵبژاردەکان لە نێو میدیای نوێدا بێت.”

پڕۆژه‌ی یۆلۆكۆست شێوازی یادكردنه‌وه‌ی كاره‌ساتی هۆڵۆكۆستی گۆڕی

دیدی من
 ژیوار جەوهەر

ئه‌گه‌ر سه‌ردانی وڵاتی ئه‌ڵمانیا بكه‌یت و به‌ لای مۆنۆمێنتی هۆڵۆكۆست‌دا بڕۆیت، گه‌نجانێكی چالاک و پڕوزه‌ ده‌بینی به‌ ناو مۆنۆمێنته‌كه‌دا دێن و ده‌چن، یاریی چاوشاركێ ده‌كه‌ن، ئیستێک ده‌كه‌ن و جگه‌ره‌یه‌ک ده‌كێشن، له‌گه‌ڵ ئه‌مانه‌شدا سێڵفی به‌ شێوازی جیاواز ده‌گرن و له‌ تۆڕه‌ كۆمه‌ڵایه‌تییه‌كاندا بڵاوی ده‌كه‌نه‌وه‌.

شاهاك شاپیاره‌، نووسه‌ر و هونه‌رمه‌ندی ئیسرائیلیی دانیشتووی به‌رلین، ته‌حه‌مولی بینینی ئه‌م جۆره‌ دیمه‌نانه‌ی نه‌كرد و به‌ پڕۆژه‌یه‌ک كۆتایی به‌م دیارده‌یه‌ هێنا، ”پێم وایه‌ خه‌ڵكی له‌ ئامانج و مه‌به‌ستی ڕاسته‌قینه‌ی ئه‌م مۆنۆمێنتانه‌ تێنه‌گه‌یشتوون“.

[playbuzz-item url=”//www.playbuzz.com/didimn10/yolocaust” info=”false” shares=”false” comments=”false” recommend=”undefined”]

شاپیاره‌ ده‌یان فۆتۆی له‌ تۆڕه‌ كۆمه‌ڵایه‌تییه‌كان هێنا، كه‌ له‌ مۆنۆمێنته‌كه‌ گیرابوون، پشته‌وه‌ی فۆتۆكانی گۆڕی به‌و فۆتۆیانه‌ی كه‌ تاوانی نازییه‌كان و  كۆمه‌ڵكوژیی جووله‌كه‌كان پیشان ده‌ده‌ن؛ دواتر، ١٨ی ئه‌م مانگه‌ پڕۆژه‌یه‌كی به‌ ناوی یۆلۆكۆست –  Yolocaust –  ڕاگه‌یاند، كه‌ ماڵپه‌ڕێک بوو،‌ دوازده‌ فۆتۆی  له‌خۆ ده‌گرت. به‌ ماوه‌یه‌كی كه‌م، فۆتۆ ده‌ستكاریكراوه‌كان له‌ زۆربه‌ی ماڵپه‌ڕ و لاپه‌ڕه‌ی تۆڕه‌ كۆمه‌ڵایه‌تییه‌كان بڵاو بوونه‌وه‌.

شاپیاره‌ له‌ خواره‌وه‌ی ماڵپه‌ڕه‌كه‌ پێشنیارێكی كردبوو:‌ ئه‌گه‌ر خاوه‌نی فۆتۆكه‌ په‌یوه‌ندیی به‌ شاپیاره‌وه‌ بكات، ئه‌وا فۆتۆكه‌ی له‌سه‌ر ماڵپه‌ڕه‌كه‌ ده‌سڕدرێته‌وه‌.

«بازدان به‌سه‌ر جووله‌كه‌ مردووه‌كاندا»

پاش ئه‌وه‌ی زۆرێک له‌ خاوه‌نی فۆتۆكان په‌یوه‌ندییان به‌ شاپیاره‌وه‌ كرد و داوای لێبوردنیان كرد كه‌ به‌م جۆره‌ فۆتۆیان له‌م شوێنه‌ گرتووه‌ و پێیان گوتووه‌ له‌ په‌یاماكه‌ی تێگه‌یشتوون، ٢٦ی ئه‌م مانگه‌، ته‌واوی فۆتۆكان له‌سه‌ر ماڵپه‌ڕه‌كه‌ سڕانه‌وه‌.

له‌ ئێستادا، ته‌نها په‌یامێكی كورتی شاپیاره‌ و ئه‌و نامانه‌ له‌سه‌ر ماڵه‌په‌ڕه‌كه‌ ده‌بینرێت، كه‌ بۆ شاپیاره‌ ده‌رباره‌ی پڕۆژه‌كه‌ نێردراون، هه‌روه‌ها نامه‌ی ئه‌و كه‌سانه‌یش كه‌ فۆتۆكانیان له‌ پڕۆژه‌كه‌دا به‌كار هێنرابوو.

به‌شێك له‌ په‌یامه‌كه‌ی شاهاک شاپیاره‌:
ئه‌م ماڵپه‌ڕه‌ زیاتر له‌ دوو ملیۆن و نیو بینه‌ری هه‌بووه‌. شته‌ سه‌یره‌كه‌ ئه‌وه‌یه‌ كه‌ پڕۆژه‌كه‌ گه‌یشته‌ ئه‌و دوازده‌ كه‌سه‌ش كه‌ سێڵفییه‌كانیان له‌ پڕۆژه‌كه‌دا نماییش كرابوو. نزیكه‌ی هه‌موویان له‌ په‌یامه‌كه‌ تێگه‌یشتوون، داوای لێبوردنیان كردووه‌ و بڕیاریان داوا سێڵفییه‌كانیان له‌ هه‌ژماره‌ تایبه‌ته‌كانیان له‌ فه‌یسبووک و ئینستاگرام بسڕنه‌وه‌. بێجگه‌ له‌مه‌ش، نامه‌ و ده‌ستخۆشیی زۆر دڵخۆشكه‌رم بۆ هاتووه‌ له‌ لایه‌ن لێكۆڵه‌ره‌وه‌كانی هۆڵۆكۆست، ئه‌و كه‌سانه‌ی له‌ مۆنۆمێنته‌كه‌ كاریان كردووه‌، ئه‌و كه‌سانه‌ی خێزانه‌كانیان له‌ كاتی كاره‌ساتی هۆڵۆكۆستدا له‌ده‌ست داوه‌، ئه‌و مامۆستایانه‌ی ئه‌م پڕۆژه‌یه‌ وه‌ک وانه‌ له‌ فێرگه‌كه‌ندا ده‌ڵێنه‌وه‌، هه‌روه‌ها كه‌سانێكی شه‌یتانیش كه‌ وێنه‌ی هاوڕێ و ئه‌ندامی خێزانه‌كانیان بۆ ناردووم بۆ ئه‌وه‌ی فۆتۆشۆپیان بكه‌م…

This slideshow requires JavaScript.

سەرپەرشتیاری بازاڕی هیوا: داوا لە هونەرمەندان دەکەم ڕیکلام بۆ بازاڕەکە بکەن

دیدی من ئاراس عەبدولڵا

کاتێک لە شەقامی سالم‌ـەوە دەچیتە ناو کارگەی جگەرەی سلێمانی، لە کۆتاییی کارگەکەدا بازاڕێک کراوەتەوە بەناوی بازاڕی هیوا و تیایدا ژمارەیەک کەرەستە نماییشکراوە بۆ کڕیاران. داهاتی ئەم کەرەستانەش بەشێکی بۆ نەخۆشخانەی هیوا و هاوکاریی توشبووانی شێرپەنجەیە. خاوەنی بیرۆکەی کردنەوەی ئەم بازاڕە و سەرپەرشتیاری پرۆژەکە خاتوو ڕێزان نادرـە، کە بۆ خۆی دەرونناسە و ماوەیەک لەناو نەخۆشخانەی هیوا کاری کردووە.

1

ئێمە کە گەیشتینە بازاڕی هیوا، ئەو بەناو بازاڕەکەدا دەگەڕا، کاتێک لەبارەی بازاڕەکە و چۆنییەتی کردنەوەی ئەم بازاڕەوە لێمان پرسی، خاتوو ڕێزان نادر وەڵامی داینەوە و گوتی: “من پێشتر دوو ساڵ لە نەخۆشخانەی هیوا کارم کردووە، دەزانم نەخۆشخانەکە پێویستی بە چییە، هەمیشەش بیرم لەوە کردووەتەوە چۆن هاوکاریی نەخۆشخانەکە بکرێت، لەڕاستیدا نەخۆشخانەکە ساڵی ٨٠ ملیۆن دۆلاری پێویستە، بۆ ئەوەی کە بتوانرێت چارەسەری نەخۆشەکانی پێ بکەین، حکومەت بەتەنیا ناتوانێت ئەو کارە بکات، دەبێت هاوڵاتیشی لەگەڵدا بێت، پرۆژەی گەورەی بۆ بکرێت. ئەمانە زۆر گرنگە بیری لێ بکرێتەوە، منیش بیرۆکەیەکی وام لەلا دروست بوو کە بازاڕێک بۆ نەخۆشخانەکە بکرێتەوە. کاتێک چووم بۆ لای دکتۆر دۆستی، بەڕاستی زۆری پێ خۆشبوو و بیرۆکەکەی پەسەند کرد و منیش دەستم کرد بەم کارە.”

20160629_223603

لە درێژەی گوتەکانیدا ئەو خاتوونە بۆی ڕوون کردینەوە: “من هیوادارم نەخۆشخانەی هیوا بازاڕی تایبەت بە خۆی هەبێت و بەبەردەوامی کراوە بێت، ئەم بیرۆکەیەشم بە یەکەی کارگێڕیی نەخۆشخانە ڕاگەیاندووە، ئەم بازاڕەی ئێستاش ئەزموونێکە بۆ ئەوەی بزانرێت بازاڕەکە سوودی هەیە یان نا.”

20160629_223352

گفتوگۆی ئەوەمان لەگەڵ خاتوو ڕێزان کرد کە دەکرێت ئەم پرۆژەیە لە داهاتوودا گەورەتر بکرێت، پێشنیاری ئەوەمان کرد، دەتوانن لە ساڵانی ئاییندە لە ڕێگەی هونەرمەندانی ناسراوەوە کۆنسێرتی گەورە بکرێت لەناو بازاڕەکە وەکو ڕیکلام و هاوکارییەک بۆ بازاڕەکە، ئەو پێشنیارەکەی ئێمە پێ جوان بوو و گوتیشی: “ئێمە ئەمساڵ یەکەمین ئەزموونمان، ئەم بیرۆکانەی ئێوە و هاوڵاتیانیش هەیانە، هەموویان کۆ دەکەینەوە، بۆ ئەوەی بتوانین ئەو بیرۆکە جوانانە بکەین بە پرۆژەی گەورە گەورە، بۆ ئەوەی داهاتێکی باش بۆ نەخۆشخانەکە کۆ بکەینەوە.”

20160629_224938

خاتوو ڕێزان، سەرپەرشتیاری بازاڕی هیوا بۆ هاوکاریی تووشبووانی نەخۆشیی شێرپەنجە، لە کۆتاییدا هیوای خواست هونەرمەندان زیاتر بەدەم پرۆژەی هاوشێوەوە بێن و گوتی: “لێرەوە داوا لە سەرجەم هونەرمەندان دەکەم کە بەشداری لەم پرۆژەیەدا بکەن و ڕیکلام بۆ بازاڕەکە بکەن.”

20160629_225758

لەناو بازاڕەکەدا لەگەڵ ئەوەی ژمارەیەک کۆمپانیا و خاوەنکار کاڵاکانی خۆیان نماییش کردووە بۆ کڕیاران، هاوکات گروپێکی موزیک بەهاوکاری ماڵی موزیک و ژمارەیەک موزیسیانی گەنج، موزیک بۆ ئامادەبوان دەژەنن، بەو هیوایەی بتوانن لەو ڕێگەیەوە ئەوانیش کۆمەک بۆ نەخۆشخانەکە کۆ بکەنەوە، محەمەد سەعید، سەرپەرشتیاری ماڵی موزیک دەربارەی چالاکییەکانی ماڵی موزیک لە بازاڕەکە، گوتی: “لەگەڵ کردنەوەی ئەم بازاڕەدا، ماڵی موزیک ستەیجێکی دروست کردووە و شەوانە نزیکەی دوو کاتژمێر لایڤ موزیک‌ـمان هەیە، ئەو گروپانەی بەشداری دەکەن لە کارە موزیکییەکاندا بەشێکیان سەر بە ماڵی موزیکن و بەشێکی دیکەش موزیسیانانی دیکەن.”

20160629_225936

لە بەشی پشتەوەی بازاڕی هیوا، سەرنجمان دا ژمارەیەکی بەرچاو لە تابلۆ و کاری هونەریی هونەرمەندانی شێوەکاری کورد نماییش کراون و کارەکان بۆ فرۆشتن بوون، دوای پرسیارکردنمان لە هونەرمەندی شێوەکار هەرێم جەمال، دەربارەی ئەم بەشەی بازاڕەکە، بەم جۆرە وەڵامی داینەوە: “ئێمە وەکو کۆمەڵێک لە شێوەکارانی کورد لە شارە جیاجیاکانی کوردستان‌ـەوە هەستاین بەم کارە، کە بریتییە لەوەی هەر هەونەرمەندێک بە چەند تابلۆیەکی خۆی بەشداری بکات لەم بازاڕەدا و داهاتی تابلۆکانیش بە پێی خواستی هونەرمەندەکە لە سەدا سی تا پەنجای دەگەڕێتەوە بۆ نەخۆشخانەی هیوا.”

لە بەشێکی بازاڕەکەدا خێزانێک کە هاتبوون بۆ بازاڕکردن، بەشێک شتیان لە بازاڕەکە کڕی بوو و بەدوای پێداویستی دیکەی خۆیاندا دەگەڕان، ساسان لەتیف یەکێک لە ئەندامانی ئەو خێزانەمان دواند، سەبارەت بە کردنەوەی بازارێک کە داهاتەکەی بۆ هاوکاریکردنی نەخۆشانی تووشبوو بە شێرپەنجەیە، ئەو کڕیارە گوتی: “کردنەوەی بازاڕێکی لەم جۆرە بە شتێکی زۆر باش دەزانم و ئامادەم گەر بازاڕێک بکرێتەوە سەرجەم پێداویستییەکانی ئێمەی تێدا بێت، ئێمە بێین و لێرە بازاڕ بکەین و پێداویستییەکانمان بکڕین، هیوادارم لە ئاییندەدا بازاڕێک بکرێتەوە سەرجەم پێداویستییەک لەخۆ بگرێت بۆ ئەوەی بتوانین لە ڕێگەی کڕینی ئەو پێداویستییانەوە زۆرترین سوود بگەیەنین.”

20160629_230300

بازاڕی هیوا لەناو کارگە جگەرەی سلێمانی، لە ڕۆژی ٢٦/٦/٢٠١٦ کرایەوە و ڕۆژانە لە کاتژمێر ٦:٠٠ـی ئێوارەوە بەڕووی کڕیاراندا کراوەیە تا کاتژمێر ٢:٠٠ـی شەو، ئەم بازاڕە بڕیارە تا ٢/٧/٢٠١٦ بەڕووی کڕیاراندا کراوە بێت و لە کۆتاییشدا داهاتی بازاڕەکە دەدرێتە نەخۆشخانەی هیوا لە شاری سلێمانی، کە نەخۆشخانەیەکی تایبەتە بە چارەسەرکردنی نەخۆشانی تووشبوو بە شێرپەنجە.