Category Archives: هەواڵ

کەیهان کەلهووڕ و عەلیڕەزا قوربانی کۆنسێرتێک ساز دەکەن

دیدی من

لە زنجیرەی پازدەهەمین ساڵیادی موزیکی جیهانیی ئاسیای بچووک، کەیهان کەڵهووڕ و عەلیڕەزا قوربانی، موزیسیانی کورد و گۆرانیبێژی فارس، بە سپۆنسەریی بانکی تی دی، پێکەوەلە تۆرۆنتۆی پایتەختی کەنەدا لە ١٤\٥\٢٠١٧دا کۆنسێرتێک ساز  دەکەن.

یەکێک لە هەرە خۆشەویسترین و کونسڵی موزیک و گۆرانیی وڵاتی ئێران،هەریەکە لە کەیهان کەڵهووڕی کەمانچەژەن و عەلیڕەزا قوربانی گۆرانیبێژ، پێکەوە لە کۆنسێرتێکدا بەشداری دەکەن، کە بڕیارە لەو کۆنسێرتەدا شیعرە کلاسیکییەکان بکرێنە گۆرانی و تێکەڵ بە موزیک بکرێن. لەگەڵیاندا ژەنیاری تۆمباک، بەهرۆز جەمالی، بەشدار دەبێت.

نوێترین گۆرانی علیرزا قوربانی- فروغ

نوێترين ئەلبوومى گۆرانيى هۆمايون شەجەريان بڵاو کرايەوە

ديدى منموزيکێ ما
لە فارسييەوە: سەليم جەمال

ئەلبوومى گۆرانیی ڕەگى خەوى هۆمايون شەجەريان بڵاو کرايەوە، کە تێيدا سوهراب پوورنازرى کارى موزيکى بۆ ئەنجام داوە و لە لايەن کۆمپانياى هونەریی شار بڵاو کراوەتەوە.

ئەو ئەلبوومە جگە لەو موزيکەى کە بۆ فيلمى سينەمايى ڕەگى خەو بەرهەم هاتووە، لە چوار تراکى ديکەيش پێک هاتووە، بە ناوەکانى ئەهاى ئاگەدار، ڕەگى خەو، هەور دەبارێت و خەريکە گريانم دێت. لەو ئەلبوومەدا سوود لە شيعرەکانى شاعيرانى کلاسيکی، وەک مەولانا جەلالەدين، حسێن مەنزەوى و ئەمير خەسرەو دەهلەوى، وەرگيراون.

دەيڤد گارنر، موزيسيانى ئەمەريکى، بەرديا کيارەس موزيسيان و ڕابەرى ئۆرکسترا و ئارين کەشيشى موزيسيان و ژەنيارى گيتاری باس، لەو ئەلبوومەدا ڕۆڵى ڕێکخستنى گشت تراکەکانيان بينيوە.

بەم زوانە فيلمى سينەمايى ڕەگى خەو دەست بە نماييشکردنی گشتیی دەکرێت، لە کاتێکدا کە ئەو فيلمە لە فێستيڤاڵى فيلمى فەجر نماييش کرا و خەڵاتى باشترين ئەکتەرى ژن بەخشرايە لەيلا حاتەمى، ئەکتەرى بەتواناى وڵاتى ئێران.

شایەنی باسە هۆمايون شەجەريان و سوهراب پوورنازرى ماوەيەک بەر لە ئێستا ئەلبوومێکى ترى ڤيديۆييان بە ناوى نهێنیی خوداوەند بڵاو کردووەتەوە.

كرته‌ لێره‌ بكه‌ بۆ داگرتنی ته‌واوی ئه‌لبوومی ڕه‌گی خه‌و

به‌ كولتووركردنی گوێگرتن له‌ موزیک له یادی كۆمه‌ڵكوژییه‌كانی گه‌لی كورددا

دیدی من

ساڵانه ‌له ‌باشووری كوردستان یادكردنه‌وه‌ی كاره‌ساتی كیمیابارانكردنی شاری هه‌ڵه‌بجه ‌به‌ چه‌ندان گۆرانیی شینوشه‌پۆڕ و نیشاندانه‌وه‌ی وێنه‌ی تۆقینه‌ری یاده‌كه ‌له‌ كه‌ناڵه‌كانه‌وه‌ ته‌نها بۆ ماوه‌ی بیست و چوار كاتژمێر، به‌ڕێوه‌ ده‌چێ. ده‌كرێت یاده‌كان كلتووریتر و جوانتر بكرێنه‌وه‌، تا هه‌م دڵته‌نگی و هه‌م شادمانیمان به‌ شێوه‌ی فه‌رهه‌نگیتر نماییش بكه‌ین.

ئه‌مساڵ مامۆستا چیا فایه‌ق، مامۆستا له‌ به‌شی كۆمه‌ڵناسیی زانكۆی سلێمانی، هه‌نگاوی به‌ كولتووركردنی یاده‌كه‌ی به‌ په‌خشكردنی پارچه‌موزیكێكی هونه‌رمه‌ندی كورد كه‌یهان كه‌لهووڕ ده‌ست پێ كردووه. ‌دیاره ‌له‌ بنه‌ڕه‌تدا كه‌لهووڕ كاره‌كه‌ی به‌ناوی شاری خامۆشـه‌وه ‌بۆ هه‌ڵه‌بجه‌ی كردووه‌‌ و بیرۆكه‌كه‌ی مامۆستا چیا فایه‌ق ئاماده‌كردنه‌وه‌ی سیدییه‌كی ئه‌و موزیكه‌یه ‌به‌ هه‌مان ناوی شاری خامۆشه‌وه‌، پاشان بڵاوكردنه‌وه‌یه‌تی به‌ناو ناوه‌نده‌ كولتووری و هونه‌رییه‌كانی شاری سلێمانیدا، هاوتا بۆ كافێ، مۆڵ و شوێنه‌ گشتییه‌كان. بۆ ئه‌م مه‌به‌سته‌ش ڕای كه‌یهان كه‌لهووڕ وه‌رگێراوه‌ و خۆشحاڵیی خۆی ده‌ربڕیوه‌ كه‌ مایه‌ی شانازییه‌ ‌بۆ ئه‌و، هاوڕێیانی ‌كوردستان و شاری هه‌ڵه‌بجه ‌موزیكه‌كه‌ی په‌خش بكه‌ن.

دەربارەی ئەم پرۆژەیە چیا فایەق بۆ دیدی من گوتی: ”مه‌به‌ست له‌م‌ كاره ‌ئه‌وه‌یه ‌هه‌مان  موزیک له‌ شوێنه ‌جیاكاندا سه‌ر له‌ به‌یانی تا كۆتایی ڕۆژه‌كه (١٦/٣) ‌پەخش بكرێت و به‌ جۆرێكی تر ده‌ست بده‌ینه‌وه‌ له‌ یاده‌وه‌رییه‌كانی خۆمان، به‌مه‌ش ده‌بێته ‌پرسیار بۆ كه‌سانی بێگانه ‌و ته‌نانه‌ت كه‌مایه‌تیی تری نیشته‌جێی شاری سلێمانی، ئه‌مه‌ش وا ده‌كات كه‌ ڕێز له‌ برین و ئازاری ئێمه‌ بگرن.“

ڕوونیشی کردەوە: ”دیزاین و هێلكاریی سیدییه‌كه ‌هونه‌رمه‌ند گۆران محه‌مه‌د كردوویه‌تی و ماڵپه‌ڕی كولتووریی دیدی من و گرووپی کەشکۆڵ، كاری میدیایی بۆ پڕۆژه‌كه ‌ده‌كات و کەمپەینێک لە سۆشیال میدیا بۆ بڵاوکردنەوە و تایبەتکردنی ئەم موزیکە بە یادی کارەساتی کیمابارانکردنی هەڵەبجە، ڕادەگەێنێت. هیوادارین هه‌مووان به‌شدار بن له‌ بڵاوكردنه‌وه‌ی پرۆژه‌كه‌.“

شاری خامۆش / شانزەی سێ ئازارمان دەکەین بە ئاواز

زەمەنێكه جەستەی نیوه مردووی ئەم دنیا بچوكەی ئێمه به شیوەن و پرسه لەم ئازار بۆ ئەو ئازار هەڵدێت. ساڵانێكه له ڕێگەی گێڕانەوەی نۆستالیژیی و كڕاندنی قەتماغەی برینەوه چاومان دەسڕین، هەر بەدوای ڕۆحی قوربانی كورد و نیشتیمانەوه شیوەنمان گێڕاوه و هیچ كاتێك له بارەیەوه تێڕانەماوین. كاتێك لەخۆمان بپرسین هەڵەبجه چییه؟ جگه له فرمێسكڕشتن و نەفرەتكردن له سێو هیچمان نییه! لە بارەی ئەنفالەوه هێشتاش له بیابانی باشوور دەڕوانین! بۆ شەنگالیش چەكەكانمان لەسەر پێیه شێوازی گێڕانەوەی یادەوەریی ئێمه هاوشێوەی پرۆسەكانی لەناوبردن و قڕكردنی كورد تاقەتپڕوكێنه، به جۆرێك كه هیچ دەلالەتێكی یادەوەری و ڕێزگرتنی كارەساتی لەخۆ نەگرتووه، ئەمه جگە لەوەی ئەم قوربانیدان و قڕكردنانه هیچی به ئێمه نەبەخشیوه. چونكه ئەگەر كارەساتەكان هیچ به جڤات نەبەخشن، ئەوا جڤات كارەساتەكان له یاد دەكات. لەم چەند ساڵەی دواییدا بە ڕوونی تێبینی ئەوه دەكرێت. جڤاتێك نەتوانێت پارێزگاری له ئینتیمای تاكەكانی به خۆیەوه بكات، ناتوانێت ئینیتما بۆ یادەوری و كارەساتەكان دروست بكات. هەروەكو ئەو تێزەی كۆمەڵناسی فەرەنسی مۆریس هالبواكس لەبارەی یادەوەرییەوه دەیخاته ڕوو، بەوەی كه یادەوەری تاك تەنها لە نێو خودی تاكەكەسدا قەتیس نابێت، بەڵكو جێگەیەك له چوارچێوەی ژیانی جڤاتدا دەگرێت، بە مەرجێك جڤات دەرفەتی پەیوەندیگرتنی ئەو یادەورییه بەخۆیەوه بدات. جڤاتی ئێمه له ڕێگەی شێوازه سواوەكەیەوه ناتوانێت یادی هەڵەبجه له یادگه‌ی هەڵەبجەیەكانیشدا بپارێزێت. ئەمه جگه لەوەی ئێمه خەریكین یادەوەری مەسرەف دەكەین وەك ئەو كاڵایانەی له بۆنه و ئاهەنگەكاندا مەسرەفیان دەكەین. هەروەها بەپێی تێزی هالبواكس ئەوەی بەردەوامی به مانەوەی جڤات دەدات، یادەوەرییه. له كۆمەڵگەی ئێمەدا دوو هۆكاری سەرەكی بوونیان هەیه تا یادەوەری ئێمه پەرتبێ: یەكەم زۆری كارەساتەكان و دووەمیان خەیاڵدانی بەتاڵی سیاسی كورده. له ڕاستیدا هۆكاری یەكەم، سیاسییەكان بۆ نماییشی جەماوەری و گەمەی سیاسی بەكاریان هێناوه لە كاتێكدا دەبوو بەپێچەوانەوه بێت، تا دۆزی ئێمه هەمیشه دەستی بەتاڵ نەبێت. دروستكردنی سیمبول و یادەوەری، پێویستی به ناوەندێكی كۆمەڵایەتی و كولتووری عەقڵانی و ڕێكخراو هەیه، تا بتوانێت پەیوەندی یادەوەری ناو زیهنی تاك لەگەڵ ڕووداوەكاندا له پانتایی گرووپە لۆكاڵیەکەوه، بۆ پانتایەكی بەرینتری جوگرافی فراوان بكات. ئێمه نەك هەر نەمان توانیوه له ڕێگەی قوربانیدان و كارەساتەكانەوه له نێو جەنگەڵی جیهاندا خۆمان بپارێزین، بەڵكو نەمانتوانیوه حورمەتی قوربانییەكانیشمان بگرین. له سۆنگەی وردبوونەوەیەكی ساده و بچكۆلەوه بیرمان لەوه كردەوه كه نەریتێكی دیكه جێگەی ئەو بیمارییه له یادكردنەوەی كارەساتەكاندا بگرێت. بە جۆرێك ئەگەر ڕێبوارێك لەو ڕۆژەدا لەشارێكی كوردستان بێت، بپرسێت بۆ؟ پێمان وابوو ئەگەر كۆی شوێنه گشتییەكانی شاری سلێمانی لەو ڕۆژەدا پارچه مۆزیكی شاری خامۆش‌ـی شاكاری كەیهان كەلهووڕ پەخش بكەن كه كارێكی ناوازەیه بۆ یادی هەڵەبجه، هاوكات دەزگا میدیاییەكان له بری شیوەنێكی دەستەپاچه و گێڕانەوەیەكی بێ تەكنیك، بێدەنگ بن و تەنها ئەم موزیكه پەخش بكەن، یان كاتێكی زۆریان بۆ ئەمه تەرخان بكەن، زۆر پەیامدارتره. ڕەنگه تاكەدەنگی ئێمه دوور له ژاوەژاوی سیاسییەكان و بۆڵەبۆڵ و ناڵەی خێڵ، موزیك بێت. موزیك هەم دەتوانێت وەك زەردەپەڕ دەنگی حیكایەتی غەدری ئێمه لە دووتوێی حەریرا هەڵبگرێت و هەم دەتوانێت پرسیار لە جیهان و ئایدۆلۆژیاكانی بكات لە بارەی مەرگی ئێمەوه. زیاده گۆیی نییه بڵین: ئەم كاره دەیان دەلالەتی سیمبولی هەیه. ئەگەر ئومێدی ئەم بیره بچوكه بگاته جێ و رۆژێكی تەواو شارێك و دەیان شاری كوردستان به تێكڕا گوێ له یەك ئاواز بگرن.

چیا فایەق

 دەتوانن بە بڵاوکردنەوەی بەستەری موزیکەکە لە پەڕە و ئەکاونتەکانی خۆتان له‌ تۆڕه‌ كۆمه‌ڵایه‌تییه‌كان لەگەڵ هاشتاگی #هه‌ڵه‌بجه‌_شاری_خامۆش #HalabjaSilentCity بەشداری لەم کەمپەینەدا بکەن و موزیکەکەی کەیهان کەلهووڕ بکەن بە سمبولێک بۆ شاری هەڵەبجەی شەهید.

به‌ وێنه‌؛ یه‌كه‌م ڕۆژی كۆنسێرتی گرووپی ڕۆنا له‌ سینه‌ما سالم

دیدی من

ئێواره‌ی ڕۆژی ٢ـی ٣ـی ٢٠١٧، یه‌كه‌م ڕۆژی كۆنسێرتی گرووپی ڕۆنا له‌ سینه‌ما سالم به‌ڕێوه‌ چوو. كۆنسێرته‌كه‌ له‌ لایه‌ن ناوه‌ندی غه‌زه‌لنووسه‌وه‌ ڕێك خراوه‌. بڕیاره‌ ڕۆژی هه‌ینی، ٣ـی ٣ـی ٢٠١٧ دووه‌م ڕۆژی كۆنسێرته‌كه‌ به‌ڕێوه‌ بچێت.

This slideshow requires JavaScript.

نوێترين ئەلبوومى گۆرانیى شاهين نەجەفى بڵاو كرايەوە

ديدى من پێگەى فەرميى شاهين نەجەفى

لە فارسييەوە: سەليم جەمال


شاهين نەجەفیی گۆرانيبێژ، گۆرانينووس و موزيسيانى پڕۆتێستى ناودارى فارس، نوێترين ئەلبوومى خۆى بە ناوى «ڕاديكاڵ» بڵاو كردەوە. نه‌جه‌فی لە ئێستادا لە وڵاتى ئەڵمانيا نيشتەجێيە؛ بە هۆى ڕەخنە و تانەگرتنى لە سياسەتى وڵاتی ئێران، لە لايەن وڵاتى ئێرانەوە ڕێگریی لێ ده‌كرێت بچێته‌ وڵاته‌كه‌یه‌وه‌ و سزاى لە سێدارەدانى بەسەردا سەپێندراوە.

  نەجەفى لە دواى كۆچكردنى بۆ وڵاتى ئەڵمانيا، تاوەكو ئێستا بەردەوامە لەسەر چالاكييەكانى خۆى لە بوارى موزيكیى ڕاپ و ڕۆك، هەروەها هەڵبژاردنى شيعرى كۆمەڵايەتیى و سياسیى. ئەو هەوڵ دەدات جەوهەرى شاعيرانە و ئەدەبی، چەمكى فەلسەفى و سياسى لەناو گۆرانیيەكانى پەيڕەو بكات. زۆرينەى شيعر و هۆنراوەكانى نەجەفى؛ سەرەڕۆيى سياسى، خۆفەڕزكردنى ئایینی، پڕۆلیتاريەت، هەژاريى، جياكارى جنسى، سانسۆركردن، چينى كرێكار، لەسێدارەدان، تلياككێشان و هۆمۆفۆبيان.

شاهين نەجەفى لە هەژمارى تايبەتیى خۆى لە تۆڕى كۆمەڵايەتیی فەيسبووك لەبارەى ئەلبوومى ڕاديكاڵ» نووسیویه‌تی: ”ئەو ئەلبوومە شێواز و ژانرگەلێك لەخۆ دەگرێت؛ لە ئاوازى كوردى تاكو« ميلۆديیەكانى فلامێنگۆ، لە پڕۆگراسيڤ مێتاڵ تا سايكدليك ڕۆك، لە ڕاپ ئۆركێستراڵ تا لق و بەشەكانى ڕۆك.“

ئەلبوومى «ڕاديكاڵ» لە دوانزە گۆرانى پێكهاتووە بە ناوەكانى: ڕاديكاڵ، لە گشت شوێنێك نيگارى كێشا، ژەهرئاو، حەزرەتى نان، ئومەت، موسەديق، ئۆقرە، مەجنوون، ڕۆكسانا، شەو، زارێك پڕاوپڕ لە هاوار، يەكبگرن.

كه‌ڤه‌ری ئه‌لبوومی ڕادیكاڵ

پێكهاتەى ئەلبوومى ڕاديكاڵ:

گۆرانينووسەكان:

  • شاهين نەجەفى: ١٠ گۆرانى نووسيوە، جگە لە گۆرانى ئومەت و زارێك پڕاوپڕ لە هاوار، كە مەزدەك نيزافەت نووسيوونی
  • كارى موزيكى تەواوى گۆرانييەكان: شاهين نەجەفى                                         

ئەركى ڕێكخستنى گۆرانيیەكان:

  • ڕاديكال، حەزرەتى نان، مەجنوون: مەجيد كازمى
  • ژەهرئاو: فەرجام
  • موسەديق: بێن تراوينسكى
  • ڕۆكسانا، يەكبگرن: كاوە
  • لە گشت شوێنێك نيگارى كێشا، ئومەت، ئۆقرە، شەو: شاهين نەجەفى 

له‌ كه‌ناڵی تایبه‌تیی شاهین نه‌جه‌فه‌فی، ده‌توانن گوێبیستی ته‌واوی ئه‌لبوومی ڕادیكاڵ بن


 
ڤیدیۆكلیپی ژه‌هرئاو، كه‌ به‌ كوالێتی 4K به‌رده‌سته‌ و به‌ شێوازی °360 كاری وێنه‌گرتنی بۆ كراوه‌

بە هاودەمیى كەيهان كەلهووڕ گرووپی موزيكیى ڕێگەى ئاوريشم بوو بە خاوەنى خەڵاتى گرامى

ديدى منمێهر نيوز

لە فارسييەوە: سەليم جەمال


بەپێى ڕاپۆرتى ئاژانسى هەواڵى مێهر نيوز، يويو ما چەلۆژەنى ناودارى ئەمەريكى – چينى و ڕابەرى گرووپی موزيكیى ڕێگەى ئاوريشم، هەروەها كەيهان كەلهووڕ موزيسيان و كەمانچەژەنى ناودارى كورد كە ئەويش يەكێكە لە ئەندامانى ئەو گرووپه‌ موزيكييە، بوون بە خاوەنى خەڵاتى گرامی بۆ باشترین ئه‌لبوومی موزیكیی جیهانی بۆ ئەلبوومى بەرەو ماڵەوە گۆرانيم بۆ بڵێ.

مەڕاسيمى بەخشينى خەڵاتى گرامى، كە بە گرنگترين خەڵاتى موزيكى جيهانى هەژمار دەكرێت، شەوى يەكشەممە ١٢/٢/٢٠١٧ لە هۆڵى ستيپلەيس لە لۆس‌ئه‌نجلۆسى ويلايەتە يەكگرتووەكانى ئەمەريكا بەڕێوەچوو. لە هەمان كاتدا ئەو بەرهەمە موزيكييە كارامانەى كە لە ساڵى ڕابردوودا بەرهەم هاتن، خەڵات كران.

به‌شێك له‌ ئه‌ندامانی گرووپی موزیكیی ڕێگه‌ی ئاوریشم له‌ كاتی به‌ده‌ست هێنانی خه‌ڵاته‌كه‌

ئەو مەڕاسيمە كە پەنجاونۆيەمين خولى بەخشينى خەڵاتى گرامى بوو، تا ڕادەيەك كەشێكى سياسى شڵەژاوى بەخۆيەوە دەبينى، بەهۆى پەلكێشبوونى دۆناڵد ترەمپ سەرۆكى نوێكارى ويلايەتە يەكگرتووەكانى ئەمەريكا.

ماڵپەڕى فەرميى گرووپی موزيكیى ڕێگەى ئاوريشم، دواى بەدەستهێنانى ئەو خەڵاتە ڕاى گەياند؛ ئەلبومى بەرەو ماڵەوە گۆرانيم بۆ بڵێ بە نيازى نزيكردنەوەى گشت پێكهاتەكانى جيهان بەرهەم هاتووە.

گرووپی موزيكیى ڕێگەى ئاوريشم لە ساڵى ٢٠٠٠دا بونياد نراوە لە لايەن يويو ما؛ گرووپێك كە ژەنيارەكانى لە نەژاد و وڵاتانى جياوازدان،  بەكارهێنانى ئامێرى موزيكى نوێگەر ئەو گرووپه‌ی هەنگاوێك لە نێودەوڵەتيبوون نزيك كردووەتەوە.

ساڵى ڕابردوو، مۆرگان نێڤڵ سينەماكارى ناودارى ويلايەتە يەكگرتووەكانى ئەمەريكا، بەڵگەفيلمێكى لەبارەى ئەو تيمە موزيكييە بەرهەمهێنا بە ناونيشانى موزيكى بێگانەكان.

كرته‌ لێره‌ بكه‌ بۆ داگرتنی ئه‌لبوومی به‌ره‌و ماڵه‌وه‌ گۆرانیم بۆ بڵێ

تيمى موزيکى ڕەستاک بە ئەلبوومێکى نوێ و جياوازەوە دەرکەوتن

ديدى من

لە فارسييەوە: سەليم جەمال


مانگی یەکی ٢٠١٧، نوێترين ئەلبوومى موزيکى تيمى ڕەستاک بە ناوى لە نێوان خۆرگەلێکى هەميشەییدا، بە دوو تيراژى دەنگى و ڤيديۆيى لە بازاڕى موزيکدا بڵاو کرايەوە.

کارى دەرهێنانى بەشى ڤيديۆيى ئەو ئەلبوومە، فەواد سەفاريان ئەنجامى داوە، کارى موزيک و ڕێکخستنى گشت تراکەکانيش هەر لەسەر ئەستۆى تيمى موزيکى ڕەستاک بووە.

لەو ئەلبوومەدا تيمى ڕەستاک بە شێوەزارى جياواز گۆرانياین چڕيوە، وەک كرمانجیی ناوه‌ڕاست، بەلووچى، کرماشانى، شيرازى، شوشتەرى، ئازەرى و بەندەرى. کە دەشێت بڵێين گوێگرانێکى زۆرى بۆ لاى خۆى ڕاکێشاوە. ئەويش بە هۆى بەکارهێنانى ئەو ئامێرە موزيکيیە نوێيانەى کە تێکهەڵکێشى يەک کراون.

ئەلبوومى لە نێوان خۆرگەلێکى هەميشەییدا، لە دە تراک پێک هاتووە، بە ناوەکانى سەکينە (کرماشان)، وەرە با بيبەين (خوزستان)، ئەى يار (هۆرموزگان)، هاوار (کوردستان)، بۆ تۆراوى؟ (کوردستان)، واسونەک (فۆلکلۆرى فارسى)، زەهيرەک (موزيک)، ئەڵڵا مەنى بارگ (بەلووچستان)، سانين يادگارين (ئازەرى) و لەزگى (موزيک).

جگە لە ژەنيارە سەرەکيیەکانى تيمى موزيکى ڕەستاک، لە ژەنيارە شارەزا و لێزانەکان سوود وەرگيراوە، بەتايبەتى بۆ ئامێرە موزيکيیە فۆلکلۆريەکان.

بەگشتى شێواز و ژانرى ئەلبوومەکانى ئەو تيمە موزيکیيە، فۆلکلۆریيە، بە نيازى توندوتۆڵکردنى پەيوەنديیەکان لەمەڕ فەرهەنگى گشت وڵاتێک.

نوێترين گۆرانیی موحسين چاوەشى بڵاو دەبێتەوە

ديدى من – پێگەى فەرميى موحسين چاوەشى

ئامادەکردن و وەرگێڕانى لە فارسييەوە: سەليم جەمال

موحسين چاوەشى گۆرانيبێژ و موزيسيانى ناودارى کوردى–ئێرانى، کە بەر لە چەند مانگێک نوێترين ئەلبوومى خۆى بە ناوى ميرى بێ زيان بڵاو کردووەتەوە، هەفتەى ڕابردوو لە هەژمارى تايبەتیی خۆى لە تۆڕى کۆمەڵايەتیی ئينستاگرام، ناوى نوێترين بەرهەمى گۆرانیی خۆى بە ناوى بەنديخانە ئاشکرا کرد.

موحسين چاوەشى ئەو گۆرانييەى بەتايبەت بۆ بەرنامەى تەلەفزيۆنى بە ناوى لێوانلێو لە پێکەنين بەرهەم هێناوە، کە لە کەناڵى نەسيم لە وڵاتى ئێران پێشکەش دەکرێت لە لايەن ڕامبود جەوان، ئەکتەرى بەتواناى سينەمايى وڵاتى ئێران.

موحسین چاوه‌شی

ئەو گۆرانييە بڕيار بوو لە شەوى يەڵدا و دەستپێکردنى وەرزێکى نوێى ئەو بەرنامە تەلەفزيۆنیيەدا بڵاو بکرێتەوە، بەڵام بە هۆى چەند هەڵەيەکى تەکنيکى دوا خرا و بڕيارە لەم زوانەدا بڵاو بکرێتەوە.

ڕامبود جەوان پێشکەشکارى بەرنامەى تەلەفزيۆنیی لێوانلێو لە پێکەنين، لە گفتوگۆيەکيدا لەگەڵ پەيامنێرى ئاژانسى هەواڵى موزيکێ ما ڕایگەياند: “دواکەوتنى ئەو گۆرانيیە بە هۆى باشنەبوونى کواليتیی ڤيديۆيەکەيە، کە بۆ گۆرانیی بەنديخانە بەرهەممان هێناوە، چونکە گۆرانيبێژێکى وەک موحسين چاوەشى شايەنى باشترينە، هەروەها لێرەدا داواى لێبوردن لە هەموو گوێگران و هەوادارانى ئەو دەکەين.”

شايەنى باسە تێکستى گۆرانیى بەنديخانە لە غەزەلێکى مەولاناى ڕۆمى وەرگيراوە، کارى ڕێکخستن، ميکس و ماسترينگ هەر خودى موحسين چاوەشى ئەنجامى داوە، عادل ڕۆحژەنيش هاودەمى ئەو لە گۆرانیى بەنديخانە  ژەنيارى ئەلەکتريک گيتارە.

كەيهان کەلهووڕ بۆ جارى پێنجەم پاڵێوراوە بۆ خەڵاتى گرامى

ديدى منروزنامێيێ شەرق

لە فارسييەوە: سەليم جەمال

ئەمە چەندين جارە كە ناوى كەيهان كەلهووڕ، موزيسيان و كەمانچەژەنى ناودارى كورد، لە نێوان پاڵێوراوانى خەڵاتى گرامى دەدرەوشێتەوە، ئەويش بە هۆى ناوازەترين موزيكە جيهانييەكان. هەروەها لە ڕابردوودا كەيهان كەلهووڕ چوار جار پاڵێوراو بووە بۆ ئەو خەڵاتە بڕواپێكراوە، بەڵام ئەم جارەيان بە ناونيشانى ژەنيارى تيمى موزيكى ڕێگەى ئاوريشم لە دوو بەشەکانی موزيكى جيهانى و موزيكى فيلم، بۆ ئەو خەڵاتە پاڵێوراوە. ئەو ساڵانێكە كەمانچەژەنى تيمى موزيكى ڕێگەى ئاوريشمە، بە ڕابەرايەتیى يويوما، ژەنيارى بەتواناى ئامێرى چەلۆ.

لە هەمان كاتدا ئەلبوومى نوێى تيمى موزيكى ڕێگەى ئاوريشم، بە ناوى بەرەو ماڵەوە بانگم بكە، لە نێوان كانديدانى بەشى باشترين موزيكى جيهانی جێگير كراوە. ئەو ئەلبوومە سەركەوتووترين ئەلبوومى ساڵى ٢٠١٦ بوو، لە ستايلى موزيكى تايبەت بە خۆيدا. لە ماوەى ڕابردووشدا توانيبووى پلەى يەكەمى موزيكى كلاسيكى بيلبۆرد بەدەست بهێنێت. ئەلبوومى بەرەو ماڵەوە بانگم بكە لە سیازدە تراک پێك هاتووە، كارى تۆماركردنى ئەو ئەلبوومە موزيكييە لە لايەن كۆمپانياى سۆنى كلاسيكاڵ ئەنجام دراوە. خاڵى ئەرێنىی ئەو ئەلبومە بوونى چەند موزيسيانێكى جيهانیيە، وەک تومانى دياباتێ، ژەنيارى ئامێرى كورا، شوجاعەت حسێنى خان، ژەنيارى سێتار، ديما ئۆرشۆو، گۆرانيبێژى وڵاتى سووريا.

ناوى پاڵێوراوانى ديكەى خەڵاتى گرامى بۆ بەشى باشترين ئەلبوومى موزيكى جيهاني، بەم شێوەيەيە: ئەلبوومى چارەنووس بەرهەمى ژنانى سكۆتلەندى، هەنگاونان لەسەر شوێنپێى باوكانمان بەرهەمى لەيدى سميت، سەرزەمينى ئاڵتوون بەرهەمى ئانوشكا شانكار و ئەلبوومى ماچ بەرهەمى كايتانۆ وێلسۆ و گيلبێرتۆ گيل.

مەڕاسيمى پەنجاونۆيەمين خولى پێشكەشكردنى خەڵاتى گرامى، لە بەرواری ١٢/٢/٢٠١٧ لە لۆس ئەنجلۆسى ویلایەتە يەكگرتووەكانى ئەمەريكا بەڕێوە دەچێت و لە هەمان كاتدا بە شێوەيەكى ڕاستەوخۆ لە كەناڵى سى بى ئێسى ئەمەريكى پێشكەش دەكرێت.

نوێترین ئەلبوومى گۆرانيى شادميهر عەقيلى بڵاو کرايەوە

ديدى من – پێگەى فەڕمیی شادميهر عەقيلى

لە فارسييەوە: سەليم جەمال

تاقى بکەرەوە، ناوى نوێترین ئەلبوومى گۆرانيى شادميهر عەقيلى، گۆرانيبێژ و موزيسيانى ناودارى وڵاتى ئێرانە، کە ڕۆژی ١٠/١٢/٢٠١٦، لە سەرانسەرى جيهان بڵاو کرايەوە.

ئەو ئەلبوومە لە هەشت گۆرانى پێک هاتووە، بە ناوەکانى تاقى بکەرەوە، تا هەتايى، تەنياييەکانم، لووتبەرزى، عەقڵ و عیشق، بەردەواميت پێ دەدەم، ڕۆژێکى سارد و دووبارەم مەکەرەوە.

شادميهر عەقيلى و وەحيد پويان ئاوازدانەرى ئەو ئەلبوومەن، ڕێکخستنى گۆرانيیەکان هەر يەک لە شادميهر، سەعيد زەمانى و ميلاد هاشمى ئەنجاميان داوە. ئارەش ميحرابيش گۆرانينووسى گشت بەرهەمەکانى ئەو ئەلبوومەيە. هەروەها شێواز و ژانرى ئەلبوم پۆپ- ڕۆکه.

بە گوتەى عەقيلى، ئەلبوومى تاقى بکەرەوە، چەندين جار گۆڕانکاریی بەسەردا هاتووە و بە چەند فلتەرێکدا تێپەڕيوە، تا گەيشتووەنەتە ئەنجامێکى شياو و بەرهەم هێنراوە.

شادميهر عەقيلى خاوەنى ١٢ ئەلبوومى فەڕمى و ٦ ئەلبوومى نافەڕمييە، ئەو لە ئێستادا لە ویلایەتە یەکگرتووەکانی ئەمەريکا دەژى و ئەلبوومگەلێکى سەرکەوتووى بەرهەم هێناون.