22/05/2019
DidiMn Logo
Top

کتێبی غەزەلەکانی مەولانا بە ناوی سوڵتانی من بڵاو بووەوە

لە لایەن دیدی من 11 مانگ پێش ئێستا

به‌رگی كتێبی سوڵتانی من

به‌رگی كتێبی سوڵتانی من

دیدی من

کتێبی سوڵتانی من بریتییە لە غەزەلەکانی مەولانای ڕومی – شاعیری ناودار و کلاسیکی فارس، کە شاعیر و وەرگێڕ شاڵاو حەبیبە کردوویە بە کوردی و کتێبخانەی یادگار چاپ و بڵاوی کردووەتەوە.

ئەم کتێبە جگە لە غەزەکانی ڕومی، هاوکات شەرحی غەزەلەکانیشی لە خۆ گرتووە، لەگەڵ باسێک سەبارەت بە پەیوەندیی نێوان شەمسی تەبریزی و مەولانای ڕومی، هەروەها نووسینێکی وەرگێڕیش دەربارەی جیهانی ڕومی و نووسینەکانی.

شاڵاو حەبیبە لە پێشەکیی کتێبی سوڵتانی مندا سەبارەت بە چۆنیەتیی کارکردنی لەم کتێبەدا نووسیویەتی: ”من لەم وەرگێڕانەدا، هەم ویستوومە ئەمانەتپارێز بم، هەمیش دەقێکی کوردیی کلاسیک بخەمە ڕوو. دیارە لە بابەت وەرگێڕانی شیعری کلاسیکەوە باس لە ئەمانەتپارێزی بکەین شتێکی سەیر و کارێکی قورسیشە، بەڵام پێم خۆش نەبووە، کاتێک بە دەقی وەرگێڕاوی ڕومیدا دەچمەوە، فارسییەکەی فەرامۆش بکەم و تەنیا کار لە کوردییەکەیدا بکەم، هەڵبەت ئەگەر کەسێک وا بکات – کە لێرەولەوێ بینیومە و و زۆر جوانیش دەرچووە- ئاسایییە، بەڵام من سەبارەت بە وەرگێڕانەکەی خۆم، حەزم کردووە خوێنەر شیعرێک بخوێنێتەوە، کە ڕومی نووسیویەتی/ یان گوتوویەتی، نەک شیعرێک کە من نووسیبێتم/ یان من مەبەستم بێت. لەم ڕووەوە جەختم لەسەر ئەو وشە و جۆری ئەو دەربڕینانە بووە، کە ڕومی بە جەختەوە دایناون، تا لە کوردییەکەیدا لە شوێن و بە شێوەی گونجاو، لێ وەک خۆیان دایان بنێمەوە. کورتەی مەبەست ئەوەیە: تەنیا پەخشانێکی کوردیم دانەڕشتووەتەوە و بە بیانووی کلاسیکبوونەوە دەقە بنەڕەتییەکە فەرامۆش بکەم، دیارە ئەمە کارەکەی بۆ سەختتریش کردووم. هەربۆیە کاتێکیش شەرحم بۆ ئەم غەزەلانە داناوە/وەرگێڕاوە، بە پێی دەقە فارسییەکان بووە و لەگەڵ کوردییەکەیشدا- وشەبەوشە- کۆک و تەبایە، بەم جۆرە خوێنەر زیاتر لە واتا و مەبەستی ڕومی نزیک دەبێتەوە.“

لە کتێبی سوڵتانی مندا لە پەراوێزی غەزەلەکانی ڕومیدا هەندێک نیوبەیتی کلاسیکی کوردی دەبینین، کە شاڵاو حەبیبە لەم بارەیەوە دەڵێت: ”لە کلاسیکی کوردیدا دەربڕین و وشەی فارسی، عەرەبی و بگرە تورکییش ڕێپێدراو بوون. بۆ دەوڵەمەندکردنی ئەم دەقانە، بۆ ئەوەی زیاتر بۆنوبەرامەی دەقی کلاسیک بدەن، جارێکی تر کلاسیکانی کوردیم خوێندوونەتەوە و سەرنجم لە وشە و دەربڕینەکانیان داوە. ئەو وشانەیش کە لە وەرگێڕانەکەمدا هاتوون و هیی زمانانی دیکەن، هەوڵم داوە- هەروەک چێژێکی ئەدەبی و بەرچاوڕوونیی تێکستەکان- لە پەراوێزدا نموونەیان بە شیعر لە کلاسیکی خۆماندا دابنێمەوە، کە ڕەنگە بۆ خوێنەریش چێژبەخش و هاوکات سوودبەخش بێت.“

کتێبی سوڵتانی من لە دووتوێی 260 لاپەڕەدا بە نرخی (4000) دینار بڵاو بووەتەوە. ئەم کتێبە حەوتەمین کتێبی شاڵاو حەبیبەیە، کە پێشتر شەش کتێبی شیعریی بە ناوی جیاجیا و لەناو بۆکسێکدا بە ناوی مۆسیقا فەرامۆشی کردم بڵاو کردەوە کە ناوەندی غەزەلنووس لە 2015ـدا چاپی کرد

Rumi, Shalaw Habiba,