دیدی من – پشتیوان کەمال
فیلمی کوڕی شاوڵ کە لە ساڵی ڕابردوودا توانی خەڵاتی هەرە فێستیڤاڵە گرنگەکان بۆ خۆی مسۆگەر بکات، لە چوارەمین خولی فێستیڤاڵی نێودەوڵەتیی فیلمی دهۆک نماییش دەکرێت.
ئەم فیلمە لە لایەن دەرهێنەری هەنگاریی لازلۆ نێمزەوە کاری دەرهێنانی بۆ ئەنجام دراوە و ڕووداوەکانی فیلمەکە باس لە کوشتنی جولەکەکان دەکات و لە کەمپی ئاوشویتز ڕووداوەکان ڕوو دەدەن لە کاتی جەنگی جیهانیی دووەمدا. فیلمەکە لە فێستیڤاڵی کان خەڵاتی گراند پریکس‌ی بردەوە، لە ئۆسکاریش خەڵاتی باشترین فیلمی بیانی بەدەست هێنا. ئەم فیلمە هەروەها توانیویەتی خەڵاتی باشترین فیلمی بیانیی گۆڵدن گڵۆب بەدەست بهێنێت و یەکەمین فیلمی هەنگارییە کە ئەو خەڵاتەی بەدەست هێنابێت. لەو لیستەی بیبیسی ئامادەی کردبوو بۆ دیاریکردنی باشترین فیلمەکانی سەدەی ٢١ ئەم فیلمە لە ڕیزبەندی ژمارە ٣٤دا بوو وەک باشترین فیلمی ئەم سەدەیە.
بڕیارە ئەم فیلمە لە پیشاندانی تایبەت بۆ ئەو فیلمانەی پەیامی ئاشتییان هەڵگرتووە لە فێستیڤاڵەکە نمایش بکرێت. سینەمای ئاشتی نماییشکردنی هەشت فیلمی درێژ لە خۆ دەگرێت و نماییشی فیلمەکان بۆ هاووڵاتیان بەبێ بەرامبەر دەبێت لە هەردوو هۆڵی کۆنگرە و هۆڵەکانی سینەماکس.
Copyright © DidiMn.com. All rights reserved.
