دیدی من – ئاراس عەبدوڵڵا
لەدوای دروستبوونی قەیرانی لە هەرێمی کوردستان، ژمارەیەکی بەرچاوە لە پاشکۆ، ڕۆژنامە و گۆڤارە کلتورییەکان داخران یاخود چالاکییەکانیان کەمکرانەوە. لەماوەی ڕابردوودا ڕۆژنامەی کلتووریی (هیچ) کە لەلایەن شۆڕش غەفوری و دلاوەر ڕەحیمییەوە بەڕێوەدەبرێت، ژمارە (سفر)ی بڵاوکرایەوە، بڕیاریشە ئەم ڕۆژنامەیە هەموو مانگێک ژمارەیەکی لێ بڵاوبکرێتەوە.
دەربارەی ناوەڕۆکی ڕۆژنامەی کلتووریی (هیچ) شۆڕش غەفوری بە دیدی منی ڕاگەیاند: “ڕۆژنامەکەمان خەمێکی کلتوورییە لەم وڵاتەدا، کارکردنە لەنێو کایەی کلتوورسازی، هەروەها کارکردنە لەسەر بەشێک لە فەرهەنگسازی لەم وڵاتەدا و بەدوور لە کاری سیاسی بڵاودەبێتەوە.”
گوتیشی: “بەشێکی گەورەی ئەم پرۆژەیە لەخزمەتی کلتووری کوردیدا دەبێت، بۆیە ڕۆژنامەی (هیچ) دەبێتە پردێک لەنێوان خودی نووسەراندا نەک بەتەنیا نووسەران و خوێنەراندا.”
ڕوونیشیکردەوە: “وەک چۆن ڕۆژنامەکەمان خەمێکی گەورەی کلتووریی هەڵگرتووە، ئێمەش وەکو بەڕێوەبەرانی ڕۆژنامەکەمان خەمی لایەنی مادییەکەیشیمان خستووەتە سەر شانی خۆمان، هیچ لایەنێک هاوکاریی ماددی ڕۆژنامەکەی نەکردووە، بەڵکو خودی نووسەرانن کە هاوکاری ڕۆژنامەکەن، بۆیە ئەگەر هەر لایەنێکیش بیەوێت هاوکاریی ڕۆژنامەکە بکات، ئێمە سوپاسی دەکەین.”
یەکەمین ژمارەی ڕۆژنامەی کلتووریی (هیچ) لە بەرواری ١/٦/٢٠١٦ بە دیزایینێکی جیاواز و کۆمەڵێک بابەتی کلتوورییەوە بڵاوکرایەوە و ئێستا لە کتێبفرۆشییەکان دەستدەکەوێت.
Copyright © DidiMn.com. All rights reserved.
