دیدی من – ڕاڤیار نەوزاد
بەشی یەك
پێش وتار / ئەبێت ئەوە لەبەرچاو بگرین كە تابەم چركەی ئێستاش لەناوەندە زانستی و جیهانیەكاندا نە (دراماتۆرگیا) وەك پیشە پیناسەیەكی دیاری هەیە ، نە دراماتۆرگ وەك كەس ئەركێكی دیاری كراو یان شیكردنەوەیەكی دیاریكراو هەیە بۆی. ئەوەی من هەوڵدەدەم لەم وتارەدا تیشكی بخەمەسەر ئەو دەستەواژەیە كە پێێ دەڵێن ( بیركردنەوە دراماتۆگی یاخود خەیاڵی دراماتۆرگی).
كلیلیەكانی بابەت:
الف/لەمڕۆدا زۆربەی دەرهێنەرەكان بەتەنها كاردەكەن و پشت بە دراماتۆرگ نابەستن، بەڵام ئەوان لەیەك كاتدا هەم دەرهێنەرن و هەم دراماتۆرگیش.(دواتر دێمەوە سەر ئەم باسە)
ب/وشەی دراماتۆرگی لە نیوەی دووەمی سەدەی بیستەم بەدیار كەوت بەڵام ئەمڕۆكە ئەو ئەركە گۆرانكاری زۆری بەسەردا هاتووە واتاكەشی گۆرانكاری بەسەردا هاتووە ، بەڵام ئێمە دەبێت سەرەتا دراماتۆرگی بناسین پێش ئەوەی كار بكەین لەسەر چەمكی (پاش دراماتۆرگی)
ج/بیردۆزێكی تیۆرسیان و نوسەری ئەڵمانی (هانز یانس لێمان) هەیە كە باس لە شانۆی درامی و پاش درامی دەكات، پرسیارەكە لێرەدا ئەوەیە : ئەگەر تیۆرێك هەبێت بەناوی شانۆی پاش دراما ، ئایا هەمان شتیش بۆ دراماتۆرگیا راستە (پاش دراماتۆرگی؟)
یەكەم / دراماتۆرگی چیە؟
لەمڕۆدا وشەی دراماتۆرگ یان دراماتۆرگی زۆر بەكار دێت ، هەندێ نمایشی شانۆیمان دیوەكە لەسەر پۆستەرەكانیان وشەی (دراماتۆرگی فڵان كەس) دانراوە، لەپێشوتردا بونی ئەم زاراوەیە كەمتر بوو بەچاو ئەوەی كە لە ئێستادا هەیە، بەڵام بەگشتی دراماتۆرگی وابەستەیە بە شێوازی نمایشەكەوە یاخود با بڵێین شێوازی دارشتنی نمایشەوە. تەنانەت ئەگەر دراماتۆرگ بونی نەبو ئەوا بەشێوازێك لە شێوازەكان كاری دراماتۆرگ بونی دەبێت
( بۆ نمونە / هەندێك لە دەرهێنەرەكان دەڵێن من فڵانە دەقی شانۆیم خوێندوەتەوە و وێنەیەك یان فیكشنێكی دیاری كراو لەلام دروست بووە سەبارەت بەم دەقە و لەسەر ئەم وێنەیە یان ئەم خەیاڵەی نمایشەكە بنیاد دەنێت ، لەم حاڵەتەدا تاك گەرای یاخود ویستی تاكی دەرهێنەر زاڵ دەبێت و ئەو ئەو شتە پێشكەش دەكات كە خودی خۆی وەك تاكەكەسێك دەیبینێت، نەك ئەو شتەی والەناو دەقە شانۆیەكەدالە روی بابەتیەوە.) لە نمونەیەوە ئەمەوێت راستەوراست بچمە ناو پێناسەی دراماتۆرگی و بڵێم:
(دراماتۆرگی زانینە لە بەرامبەر بەهرە و داهێناندا) ئەم بابەتەش لەگەڵ پێرتۆڵد برێشت و پاش پێرتۆڵد برێشت زیاتر گەشە دەكات. رونتری بكەمەوە برێشت یەكەم كەسە كەراستەوخۆ مەعریفە(زانین)ێكی زانستی دەخاتە بەرامبەر بەهرە و داهێنان لە بنیادی شانۆیدا.
(لەبەر ئەمەشە شانۆی داستانی شانۆیەكی تەواو ئەقڵگەرایە و لە وردترین وردەكاریەكانیدا كاری لەسەر ئەوە كردووە كە ئەقڵ و لۆژیك بەرامبەر بەهرە و هەست بێت، وەمنیش هەمیشە ئەوە رەتدەكەمەوە كە لۆژیكمەندی شانۆی داستان ببەسترێتەوە بە لۆژیكی ماركسییزمەوە بەڵكو پێموایە لۆژیكی شانۆی داستان جۆرێكە لە تەكنیكی شانۆی)
بابەتی دراماتۆرگی یان بڵێین خوێندنەوەوی دراماتۆرگی زۆر سودی وەرگرتووە لە زانستە مرۆیەكان بۆ گەشەكردنی بەتایبەت زانستەكانی ( كۆمەڵناسی و زمانناسی و سیمیۆلۆجی و ئەنترۆپۆلۆجی) مەبەستیش لە سود وەرگرتن لەوەیە كە ئیدی كۆمەڵێك پرسیاری لەلا دروست بوو لەسەر دەق، پرسیار گەلێك كە لەناوەوەی دەق سەرچاوەدەگرن( بۆنمونە / دراماتۆرگی دەپرسێ: لە دەقی مراوی كێوی لە چركەی پێش خۆكوشتنی كچە بچوكەكە تۆی دەرهێنەر بۆچی باڵی ئەم باڵندەیە دەبارێنی لەسەر تەختەی شانۆ.؟ ئەو ئاماژانە چین دەتەوێت بیگەیەنی لەڕێگەی ئەم وێنەیەوە .؟ باشتر نیە باڵەكان خوێناوی بن.؟ ئەی باشتر نیە كۆنسێپتێك بۆ باراندنی ئەم باڵانە دروست بكەی بەوەی سێجار لەسەر شانۆ ببارێن ، جارێ سەرەتا (سپی بێگەرد بێت) كاتێك ماڵەكە كێشەكانیان دیار نیە، جارێك لە ناوەندی نمایشەكە (پەڕی باڵەكە تۆزاوی بێت) كاتێك كێشەی گرفتە مادیەكان سەرهەڵدەدات، لە كۆتایشدا (خوێناوی بێت) ..! ئێستا دەیبینی هەم ئاماژەدارە و هەم واتادار .. ئەگەر بۆ پاساویش بگەڕێیت بۆ باراندنیان ئەوا دەكرێت لە دیزاینی ماڵەكەدا هێلانەی باڵندەكان لە قاتی سەرەوەی شوێنی نمایشەكەبێت( لێرەدایە كە دراماتۆرگیا و سینۆگرافیا پەیوەندیەكی توندیان هەیە و دواتر باسی دەكەم).
دوو/دراماتۆرگی و ڕێساكانی نمایشی شانۆی :
كاتێك كە باسی دراماتۆرگی دەكەین دەبێت ئێمە مێژوی شانۆ رونبكەینەوە ، نەك مێژوی دەقی شانۆی بەڵكو مێژوی نمایشی شانۆی ، لەبەر ئەوەی لە هەر كۆمەڵگایەكی شانۆیدا و لەهەر شانۆیەكدا كۆمەڵێك ڕێسای شانۆی پەیدا دەبن كە تایبەتن بەو كۆمەڵگاو شانۆكەیان، ئەم ڕێسایانە لە رۆژهەڵات و رۆژئاواش هەن و شێوازێك لە یاسای شانۆیان دروستكردووە ( بۆ نمونە / لە شانۆی بوكەڵەی یابانیداكە بە “بورانكۆ” ناسراوە جوڵێنەری بوكەڵەكان سەرتاپا جلی رەشیان لەبەرە ، ئەم جلە رەشانە لە كەلەپوری شانۆی یابانیدا چەسپیوە و لە یابان هەركەسێك جلی رەشی لەبەربێت لەسەر شانۆ لەلای بینەر وەك نەبینراو دادەنرێت، واتە ئەم نەبینینە بووە بە ڕێسا و كەلەپوری شانۆی یابانی، نمەنەیەكی دیكە هەیە لە شانۆی میسریدا زۆر باوە ، كاتێك ئەكتەرێكی تازە دێتە سەر تەختەی شانۆ بەتایبەت ئەگەر ئەكتەرەكە ناسراو بێت بینەرەكان خۆبەخۆ چەپڵەی بۆلێدەدەن و ئەویش دەوەستێت و خۆی بۆیان دەچەمێنێتەوە وەك رێزێك و دیسانەوە داغڵ بە نمایشەكە دەبێتەو، ئەم كەلەپورە بووە بە بەشێك لە رێسای درامی شانۆی لە میسر و هیچ گرفتێك بۆ بنیادی نمایش دروست ناكات.. بەداخەوە لەم حاڵەتەدا هیچ رێسایەكمان نیە لای خۆمان تا بەنمونە بیهێنمەوە…!!).
كەوایە شانۆ بە و پێیەی كە نمایشێكە، لەسەرەتاكانیەوە تاوەكوو سەدەی بیستەم و نۆزدە و هەژدەش ، تەواو وابەستەبوو بە ڕێساكانەوە، كە لە شوێنی دانیشتنی بینەرەوە دەستی پێدەكر و لەكوێدا دادەنیشێت و ئەو شوێنەن چۆنە كە نمایشی تێدادەكرێت و هەتا بگات بە بنەما كۆمەڵایەتیەكانی ئەو كۆمەڵگایەی كە نمایشی تێدادەكرێت و چی تێدا قبوڵكراوە و چی تێدا قبوڵناكرێت وهتد.. ڕێساكانی شانۆ بەپاڵپشتی ئەم بنەما كۆمەڵایەتیانە درووست دەبوون (بۆنمونە / ئەرستۆ كاتێ لە هونەری شێعردا بنەماكانی شانۆی نوسیوە، ئەو چاودێری ئەوشتەی كرد كە بونی هەبوو و لەسەر بونی ئەوو هەبووە ئەو ڕێسایانەی دانا، كە بریتی بون لەوەی چۆن دەقێكی شانۆی بنوسرێت، یان مەرجەكانی نوسینی شانۆنامە چیە و نوسینی نمایشی شانۆی لەو سەردەمەدا بەباڵای شێوازێكی دیاری كراو لە نمایشی شانۆی دا دەنوسرایەو، كە وابەستەبوو بە ڕێسا كۆمەڵایەتیە ئەخلاقیەكانی یۆنان ” نەبینینی خوێن” وەرێسا درامیەكان ” كە شێوازی شانۆی بەرفراوان و دوور دەی سەپاندن بەوەی وتای قەبە و جوڵەی گەورەی تێدابێت” لێرە دەتوانین بڵێین دراماتۆرگی گریكی ، هەمان نمونەش بەسەر شێكسپیر و شانۆی ئیلیزابێرسیدا دەسەپێت ، لەبەر ئەوەی شێكسپیر دەقەكانی لەسەر دیزاینی ستێجی شانۆكانی ئەو سەردەمە نوسیوە ” بۆیە ئاستەمە لەكات و شوێن تێبگەین لە هاملێتدا تا لە دیزاینی شانۆی ئەوسەردەمە تێنەگەیت” بەمەش دەتوانینین بڵێین شێكسپیر دراماتۆرگی كردووە، یاخود دراماتۆرگی ئلیزابێرسی)بۆیە دەبێت ئەوە بزانین دراماتۆرگی كار لەسەر رێسا و یاسا هەبوەكان دەكات ، چ رێسای كۆمەڵایەتی و ئەخلاقی بێت ، چ رێسای درامی و شانۆی بێت.
سێ/دراماتۆرگیا و دەرهێنان :
لە سەدەی هەژدە لە ئەڵمانیا و فەرەنسا بەتایبەتی، و لەلای دوو ناوی دیاری ئەو سەردەمە دینیس دیدرۆ و ئیفرایام لێسینگ، بیرۆكەی ئازادی هەڵسوكەوتكردن لەگەڵ دەق دا سەری هەڵدا كە ئەمە بووە دەستپێكی دەركەوتنی كارێك و پیشەیەكی نوێ لەشانۆدا ئەویش پیشەی دەرهێنان بو ، واتای دەرهێنانیش بەکورتی بەوە دێت كە كەسێك مامەڵە لەگەڵ دەقێكی نوسراودا دەكات كە مەرج نیە ئەو نوسەری بێت. دروستبونی پیشەی دەرهێنەر زۆر گۆرانكاری كرد لە ڕێرەوی نمایش و دەق و خودی شانۆش، تەنانەت نوسینی شانۆنامەشی گۆری، لەبەر ئەوەی دەرهێنان لە كاتێكدا هات كە شانۆ و شانۆنامە روانگەیەكی تەواو واقیعیان هەبوو .
لەسەرەتادا دەرهێنان بەواتای ئەوە هات كە دەبێت بە(ئەمانەت)و دەستپاكیەوە وێنەكانی ناو دەق بگوازێتەوە بۆ نمایشە، بەڵام لەو سەردەمەدا دەق چیدی وابەستەی رێساكان نەدەبوو( لەبەر ئەوەی شێكسپیر كەوتبوە قۆناغی پێش دەرهێنانەوە ، یاخود راسترە بڵێم دراماتۆرگی شێكسپیری..)
پاشان پێرتۆڵد برێشت هات برێشت بیركردنەوەیەكی تەواو تازەی هێنایە ناو شانۆیەوە كە دەتوانین بە (بیركردنەوەی برێشتی) ناوی ببەین و زۆركەس كاریگەر بوون بە ئەم بیركردنەوە برێشتیانە بەتایبەت فەرەنساویەكان، كە مەرج نیە نمایشەكانیان تەواو داستانی بوبێت ، بەڵام شتێك لە بیركردنەوەی برێشتی تێدابوو، ئەم بیركردنەوە برێشتیەش بەكورتی ئەمە بوو ( زانین بەرامبەر بەهرە و داهێنان.) ، ئەگەر لە دەقەكانی برێشت بروانین بەتایبەت لە دەقی “كڕیاری مس” ئەو ناوی خۆی بە دراماتۆرگ نوسیوە، لەهەموو تەمەنیدا برێشت خۆی ناونەناوە نوسەری شانۆنامە لەبەر ئەوەی دەق لای برێشت بۆ پرۆڤە بوە و هەمیشە كراوە بوون دەقەكانی و لەگفتوگۆكانی لەگەڵ ستافەكەی و بەپێی شوێنی نمایشەكەی گۆرانكاری تێدادەكرد، زۆرجار گفتوگۆی لەگەڵ نوسەری دیكە و فەیلەسوفەكانیش دەكرد، ئەسڵەن برێشت هیچ دەقێكی ئامادەی نەبووە و هەر لەبەر ئەمەشە چەند كۆپیەك لەهەمان دەق بونی هەیە، بۆیە دەق لای برێشت هەمیشە نمونەیەكی ئامادەكراو بووە بۆ ئەزمونكردن و پرۆڤە هەتا لە قۆناغی “بەرلین ئینسامپڵ” دا ئیدی بەتەواوی واتای دراماتۆرگیا جێگیر دەكات و لەو گروپەدا شتێكیان دروستكرد كە ناویان نا MODELLBUCH كە بەواتای (كۆكراوەی نمونەی نمایش دێت یاخود نمونەی ئاستی نمایش) و بەمەش ئەگەرەكانی نمایشان دیاری كرد و هەر ئەمەش بوە هۆی لەدایك بونی دەقە نوسراوەكانی پێرتۆڵد برێشت.
دەقی شانۆی تەنانەت دەقە كلاسیەكانیش دەق گەلێكن كە بۆ شیكردنەوە و لێكدانەوە دەبن و دەقی شانۆی دەقێكی كراوەیە ، لە كاری شیكردنەوە لێكدانەوەدا (كە كوردی خۆمان پێی دەڵێن ڕوئیا) كاری دراماتۆرگ داغڵ دەبێت یاخود بەشێوازێكی راستر بڵێم ( بیركردنەوەی دراماتۆرگی) كە ئەم دەستەواژەیە یەكەم جار لەلایەن وەرگێر و لێكۆڵەری فەرەنساوی (بێرنارد دۆرت)ەوە داڕیژرایەوە، كە ئەو لەگەڵ ڕۆلان پارت یەكەم كەسانێك بوون كە كار و شانۆی برێشتیان گواستەوە بۆ شانۆی فەرەنسی .
بەبڕوای دۆرت و پارت ( دەق هەبویەكی حەتمیە كە هەمیشە بەردەستە بۆ لێكدانەوە و شیكردنەوەگەلێكی جیا جیا و دەرهێنەر دەبێت شێوازێكی دیاری كراو هەڵبژێرێت و لەكاتی كار كردنیدا و بەتایبەت لەكاتی كار كردنی لەگەڵ ئەكتەردا و پاشان سینۆگرافەردا دەبێت كۆمەڵێك پرسیار بونی هەبێت و ئەم پرسیارانە دەبنە بنەمای واتا و شێوازی نمایشكە.)
چوار/خوێندنەوەی دراماتۆرگی و ئامادەكردنی رۆڵ :
بیركردنەوەی دراماتۆرگی لای ئەكتەرە خاڵێكی زۆر گرنگە ، گرنگتر لەوە ئەوەیە كە ئەكتەر كاتێ دەق دەگرێت بەدەستیەوە و دەیخوێنێتەوە تەنها رۆڵەكەی نەخوێنێتەوە و بەس بەڵكو رۆڵەكەی لەناو چوارچێوەی نمایشدا ئەندێشەبكات و ئەندێشەكەشی هاوبەشی پێبكات لەگەڵ رۆڵەكانی دیكەدا، هەرچەندێك ئەكتەر دەقی شانۆی و شانۆنامەنوسی بناسێت، هێندەی ئەوەش ئەكتەر ئەتوانێت قوڵتر و باشتر رۆڵ ببینێت ( هۆكارێكی زۆر ئاشكرا و رونی روكەشی بون و شكڵی بونی رۆڵ بینینی زۆربەی ئەكتەرەكانی شانۆی ئێمە نەخوێندنەوە و نەخوێندەواریە، ئەكتەرم دیوە خەڵك زۆر سەرسامی نواندنی ئەون تەنانەت ڕۆڵەكەشی نەخوێندەوەتەوە..!) لە بیركردنەوەی دراماتۆرگی ئەكتەردا هەموو رۆڵەكانی ناو دەق بەقەد یەك گرنگە، ئەگەر بۆ نمونەی دراماتۆرگی بگرێین لە مێژوی شانۆدا نمونەی بەردەست ئەو خوێندنەوەی یەكەم و چەند جارەی دەقە لەسەر مێز لەلای ستانسلاڤسكی.. كە بیركردنەوەی دراماتۆرگی لای ئەوان بەواتای شیكردنەوە و لێكدانەوەی دەق دەهات ، بەڵام پێرتۆڵد برێشت زۆر قوڵتر و درورتر دەڕۆشت لەم خوێندنەوانەدا و پرسیاری زۆر وردی لەئەكتەرەكانی دەكرد بۆنمونە( ئەم كاراكتەرە چۆن دەبینیی.؟ بۆچی وادەكات؟ ئایا كەسێكی خراپە یان باش..؟)
ئەمەش دەمكێشێت بەرەو واتایەكی قوڵتر و بابەتێكی دیكە كە ئەویش (پەیوەندی ئەكتەرە بە وتاری نمایشەوە) چۆن ئەكتەر دەبێت رۆڵ و حیوارەكەی ئەدا بكات؟ لەكاتێكدا لەپاش دروستبونی دەرهێنان گۆرانكاری زۆر زۆر بەسەر شێوازی ئەداكردن و رۆڵبینینی ئەكتەردا هاتووە و زیاتر بەرەو ئاسای بونەوە و نۆرماڵ بونەوە دەچێت ، لەپاش ئەوەی كەلەپێش دەرهێنان رۆڵبینینی ئەكتەر زیاتر شاعیرانە و وتار ئامێز بوو. دەستەواژەگەلێكی هاوتابونن لەگەڵ رۆڵ و هاوتانەبون لەگەڵ رۆڵ هاتنە ئاراواوە و لەگەڵ خۆشیان دەستەواژەی كەی و چۆن هاوتادەبی یان نابیت یان هێنایە ئاراوە و قوتابخانەكانی نواندن كاری لەسەر دەكەن، ئەم پەیوەندی ئەكتەر بە وتاری شانۆیەوە لە دەقە مۆدێرنەكاندا زۆر ئاڵۆزتر و وردتردەبێت و بیركردنەوەی دراماتۆرگی پێویستر دەبێت بۆ ئەكتەر.
پێنج/بیركردنەوەی دراماتۆرگی و سینۆگرافی:
سینۆگرافی زانستێكی تازەیە لەگەڵ ئەوەی كەوشەكە زۆر كۆنە ( سینۆ / بەواتای تەختەی شانۆ ، گرافیا / بەواتای نوسینەوەی شتێك بەهێل و ئاماژە). واتایەكی باو هەیە بەتایبەت لەلای ڕیالیستەكانەوە سەرچاوە دەگرێت كە دەیان ویست دیكۆرێكی واقیعی دروست بكەن و بنیاد بنێن، هەمان شت لە سینەما راستە ، سینەما هەوڵ دەدات واقیع بەهەمو شێوازەكانیەوە بونیاد بنێتەوە لە بینراوەكەیدا ، ئەگەر شانۆ هەمان هەوڵ بدات ئەوا دەتوانینین بڵێین ئەو دیكۆرە یان ئەو وێنەیە وێنەیەكی (وەهم دروستكەر)ە. واتای سینۆگرافیا یەكەم جار لەلایەن سینۆگرافەر و دەرهێنەری فەرەنسی (یانیس كۆكۆس)ەوە سەرچاوەی گرت كە كاریان لەگەڵ دەق و نمایشی شانۆی وەك (گشتێك)دەكرد نەوەك وەك(وێنەیەك) و پرسیاری ئەوەیان دەكرد ( لە كوێدا روداوەكە رودەدات و چۆن ئاماژە بەشوێن بكەم ” جیاوازی زۆرە لەنێوان ئاماژەكردن و دروستكردن” ، ئەبێت ئەو واتایە زۆر رون بێت كە ئێمە لە شانۆدا ئاماژە بەشوێن دەكەین نەوەك شوێن دروست بكەینەوە) و لەهەموو شتێكیش گرنگتر ئەوەبوو (چۆن و چ پەیوەندیەك لەگەڵ وەرگردا دروست دەكەم؟) ئەم پرسیار و بیركردنەوانە ئەكتەر و دەرهێنەریان ئازادتركرد ، بەڵام ئەركی سەرشانیانی گرانتر كرد، لەبەر ئەوەی شێواز و ئاماژی نوێ هاتنەبون كە شوێن دەردەخەن و شوێن ئیدی بوو بەیەكەیەیكی ئاماژەی تا ئەوەی یەكەیەكیی واقیعی بێت و كار لەسەر تەنها وێنە بكات و بینەری لەناوخۆیدا هەڵگرت و ئیدی وردە وردە ئەو شێوازە شانۆیە روبەروانە بەرەو كاڵ بونەوە چوون( لێرە لەم چەند ستاڵەی پێشو لە نمایشەكانی سەرەتا زۆر سەرەتا و شینە لەشیندام ئەم نمونەیەمان دی و لە بیركردنەوەی دراماتۆرگی سینۆگرافی ئەو نمایشانەدا وێنە پاشەكشەی كردبوو بەرامبەر بە هەست ..) لەم شانۆمۆدێرنانەدا، بینەر هەندێ جار لەكاتی نمایشەكاندا دێت و دەروات یان ئەوەتا لەناو نمایشدا، لەكاتێكدا سینۆگرافیا راهاتووە بەوەی ئەم پرسیارانە بكات ” چی هەیە لەسەر تەختەی شانۆ؟ ئەو شتەی هەیە لەسەر تەختەی شانۆ چۆن دەیەوێت بگۆڕێت یان گەشە بكات؟ شێوازی ئەو پەیوەندیە چیە كە ئێمە دەمانەوێت لەگەڵ بینەردا؟” كاری دراماتۆرگی لەم حاڵەتەدا گونجاندن و دۆزینەوەی پەیوەندیە لەنێوان بیركردنەوەی دەرهێنانی نوێ و بیركردنەوەی سینۆگرافی .
خاڵیكی دیكە كە زۆر گرنگە و دراماتۆرگی لێێ دەپرسێت ئەوەیە ( ئێمە چ پەیوەندیەك دەبەستین لەگەڵ بینەر، یاخود بینەر چۆن وەردەگرێت و پرۆسەی وەرگرتن چۆنە.؟) ئایا ئەمە نمایشێكی وەهم ئامێزە؟ ئایا دەقێكی پرسیار ئامێزە ..؟ ئەم جۆرە پەیوەندیانە پەیوەندی بەو خاڵەوە هەیە كە باسم كرد لە پێشودا (ڕێسا كۆمەڵایەتی و هونەریەكان) بەڵام بیركردنەوەی دراماتۆرگی قوڵتر دەروات لە شێوازی دانیشتن و دانانی بینەرەكان و بەڵكو ئەو لەو شێوازی پەیوەندیە دەپرسێت كە من دەمەوێت هەمبێت لەگەڵ بینەرەكەم ..؟
(كۆتای بەشی یەك)
Copyright © DidiMn.com. All rights reserved.
