19/03/2024
DidiMn Logo
Top

سیازدە ڕێگە بۆ بینینی ڕیشۆڵەیەک

لە لایەن دیدی من 2 ساڵ پێش ئێستا

دیدی من – واڵس ستیڤنس
له‌ ئینگلیزییه‌وه‌: جوتیار ژاژڵەیی

١

لەنێو بیست دانە شاخی بەفریندا
تاکە شتێک کە دەجووڵا
چاوی ڕیشۆڵەکە بوو.

٢

لە یەک کاتدا سێ ڕام هەبوو
وەک درەختێک
سێ ڕیشۆڵەی بەسەرەوە بن.

٣

ڕیشۆڵەکە لەنێو بای پایزدا خولی دەخوارد
ببوو بە بەشێکی بچووک لە نمایشە مۆسیقییەکە.

٤

ژنێک و پیاوێک
یەک شتن.
ژنێک و پیاوێک و ڕیشۆڵەیەکیش
هەر یەک شتن.

٥

نازانم کامیانم زیاتر بەدڵ بێت:
جوانیی ساتی گۆڕینی نەغمەکانی،
یان جوانیی لێڵییەکانی.
ڕیشۆڵەکە لە کاتی خوێندنیدا،
یان دوای خوێندنەکەی!

٦

چلورە بەبەردەم پەنجەرە درێژە، لێڵەکەدا
شۆڕ ببوونەوە.
سێبەری ڕیشۆڵەکە
تاوناتاوێک دەکەوتە سەر پەنجەرەکە.
ئەو کەشەی سێبەرە پچڕپچڕەکە دروستی دەکرد
شتێک بوو بە من نەدەخوێنرایەوە!

٧

 ئەی پیاوە لاوازەکانی هادام[1]
بۆچی بیرتان هەر لای باڵندە ئاڵتوونییەکانە
نابینن چۆن ڕیشۆڵەکان لەبەر پێی
ژنەکانی چواردەورتان دێن و دەچن؟

٨

شێوەزاری شیرین دەزانم
ئاوازی ڕەوان و زاڵیش.
دەشزانم
کە هەموو ئەوەی دەیزانم
لە سایەی ڕیشۆڵەکەوەیە.

٩

کاتێک ڕیشۆڵەکە لە چاو دیار نەما
بوو بە قەراغی
یەكێک لە بازنە زۆرەکانی نێو ئاسمان.

١٠

بە بینینی ڕیشۆڵەکان،
کاتێک لەناو تیشکی سەوزدا دەفڕن،
تەنانەت ئارەزووبازەکانیش
دەیکەنە بەزم و هەرا.

١١

بە گالیسکەیەکی شووشە
ویلایەتی کۆنێکتیکتی تەی کرد.
لەناکاو ترسێک دایگرت
کاتێک سێبەری گالیسکەکەی
لێ بوو بە پۆلە ڕیشۆڵە.

[1] شارۆچکەیەکی سەر بە ویلایەتی کۆنێکتیکتە لە ویلایەتە یەکگرووەکانی ئەمەریکا. واڵس ستیڤنس بەشێکی زۆر ژیانی لەم ویلایەتە بەسەر بردووە.

١٢

ڕووبارەکە هاژە دەکا.
هەبێ و نەبێ ئێستا ڕیشۆڵەکە دەفڕێت.

١٣

دوانیوەڕۆکە هەر زوو بووە ئێوارەبەفر دەباری و
بەو زووانەش خۆشی نەدەکردەوە.
ڕیشۆڵەکە لەنێوان لقی دارسنەوبەرەکاندا
هەڵکوڕمابوو.


هاوبەشی بکە