دیدی من – فیلم سكووڵ ڕیجێكتس
ئێچ. پێری هۆرتۆن
لە ئینگلیزییەوە: ساڤان عه‌بدولڕه‌حمان
هیچ فیلمسازێک نییە هێندەی ستانلی کوبریک و ئەندرێ تارکۆڤسکی توانای کاریگەریدانانیان لەسەر فۆڕم هەبووبێت. هەر مرۆڤێک بەپێی مافی خۆی دەرهێنەرێکی خاوەن دیدی تایبەت و بێوێنەیە، کەسانێکن کە هەستی داهێنانیان پشت دەبەستێت بە وردیی زیاتر و پێویستیان بە وەرگرتن و تێگەیشتن هەیە، کە ئەمەش لە ڕێگەی چەندین دید و بیرکردنەوەی دوور لە فیلمەکەوە گەشە دەسەنێت.
کارەکانی ئەم دوو دەرهێنەرە بۆکسێکە لە مانا و سیمبۆلیزم و نهێنیی ئەم جیهانەی ئێمەی تێدا شاردراوەتەوە، یاخود هەر هیچنەبێ ئەو نهێنییەی لە لایەن دوو بیرمەندی مەزنی سەدەی بیستەوە بۆمان پێشبینی کراوە.
لەگەڵ هەموو جیاوازییەکانیشیاندا، هەندێک لێکچوون لە ڕێبازە جیاوازەکانی کوبریک و تارکۆڤسکیدا لە ڕووی تەکنیک، ناوەڕۆک و تەنانەت فەلسەفەشەوە هەیە. ئەم ڤیدیۆیەی خوارەوە لە لایەن ڤوگار ئەفەندی وتارنووسەوە ئامادە کراوە، کە دیمەنی لە کارە جیاوازەکانی هەردوو دەرهێنەرەکەوە هێناوە و لە تەنیشت یەکتری دای ناون. ئەفەندی دەیەوێت لە ڕێگەی ئەم ڤیدیۆیەوە ئاماژە بە هاوتەریبی و پێکداچوونەکانیان بدات، لە هەمان کاتیشدا ئەم ڤیدیۆیە بەرچاومان ڕوون دەکاتەوە لەوەی کە چۆن دەکرێت هونەر کاریگەریی لەسەر هونەر دابنێت، تەنانەت لە ناڕاستەوخۆترین فۆڕمیشدا.
Copyright © DidiMn.com. All rights reserved.
