دیدی من – داستان مارف
١
بۆ نوسینی شیعر جەزبە نامگرێت،
بەساردی ڕۆژگار دەنوسمەوە.
٢
لە قاچەوە سەرما دەگاتە سەرم.
“زەوی کێشەکەیە”
٣
لەپەنجەرەکەوە وێنەی مانگ دەگرم،
مانگ ده‌خه‌مە تۆڕێکی کۆمه‌ڵایه‌تییه‌وه،
لەسەر وێنەکە دەنوسم: مانگی من بۆ تۆ.
“ڕۆمانس لە مەجازدا”
٤
با لە درەختەکان دەدات و گڤەی دێت،
دڵۆپە ئاوی کانیەکە، لە سەر بەردێکەوە تک تک دەچۆڕێتە جۆگەیەیەکی دی،
زیکزییکەکانی شەو،
سبەینانی کوکوختییەکان،
تۆنی دەنگتن کە دەربارەی عەشق دەدوێیت.
٥
دوریت تیرێکە ڕووەو ناوچەوانم،
نزیکیت تیرێکە لە سەرمدا.
٦
به‌م تاجە دڕکەوە که سه‌رمی ته‌قاندووه،
خه‌ون له کەللەمدایە؛
خاچ ده‌که‌مه باڵ و ده‌فڕم.
“وڕێنەی پێغه‌مبه‌رێکی کوژراو به‌ده‌م فڕینه‌وه”
٧
زستان بەڕێوەیە،
بە کراسێکی سوورەوە تۆش لەگەڵیدا.
چوار وەرزەی ڤیڤاڵدی کۆت دەپۆشن و شەراب دەخۆنەوە و لە چاوەڕوانیدان؛
بە کراسێکی سوورەوە تۆش لەگەڵیاندا.
٨
کاری ئۆنلاین
مامەڵەی ئۆنلاین
عشق و ژیانی ئۆنلاین!
“داوای لێبوردن لە کارل مارکس”
٩
قەرەباڵغییەکان ساختەن
مرۆڤ تەنهایە.
“سێڵفیەک”
١٠
نائومێدی دۆخێک نییە ڕووبدات،
تۆ نائومێدیت؛
من مرۆڤ نیم،
مرۆڤ دۆخێکە ڕودەدات.
تێبینی: ئه‌م شیعره پێشتره له ماڵپه‌ڕی باڵنده بڵاوكراوه‌ته‌وه
Copyright © DidiMn.com. All rights reserved.
